Andijon viloyatining Bo‘ston tumanida adliya bo‘limi aralashuvi bilan bir yarim yil avval hokimiyat tomonidan uyi buzdirilgan fuqaroga uy-joy qurishi uchun yer ajratib berildi. Bu haqda “Daryo” muxbiri Umidjon Mamarasulov xabar berdi.
Bo‘ston tuman adliya bo‘limi boshlig‘i Zafar Qodirovning ma’lum qilishicha, adliyaga fuqaro X.Yu.dan tuman hokimining 2019-yil 16-avgustdagi qarori ijrosi bajarilmayotganligidan norozi bo‘lib yozgan shikoyat arizasi kelib tushgan.
Aniqlanishicha, 2019-yil may-iyun oylarida ushbu fuqaroning Bo‘ston tumani, “Chorvador” mahallasi Sohibkor ko‘chasidagi yashash xonadonining bir qismi hokimiyat tomonidan davlat va jamoat ehtiyojlari uchun buzdirilib, jami 2,3 gektar yer maydoni davlat hisobiga o‘tkazilgan. Xonadonning buzilgan qismi evaziga fuqaroga tuman hokimining 2019-yil 16-avgustdagi qaroriga asosan “Chorvador” MFY, “O‘zbekiston” massividan 0,10 ga yer uchastkasini yakka tartibda uy-joy qurish uchun ajratish belgilangan. Biroq yer resurslari va davlat kadastr bo‘limi va tuman arxitekturasi tomonidan qaror ijrosi ta’minlanmagan.
“Ushbu idora xodimlari bir qator qonun hujjatlari talablarini qo‘pol ravishda buzib, oqibatda fuqaroning mulkiy huquqlari poymol bo‘lishiga sabab bo‘lgan. Aniqlangan holatlar yuzasidan Bo‘ston tuman hokimining qarori ijrosini ta’minlash bo‘yicha tuman yer resurslari va davlat kadastr bo‘limiga bajarilishi majburiy bo‘lgan taqdimnoma kiritildi. Mazkur taqdimnomaga asosan fuqaro X.Yu.ga ‘Chorvador’ MFY, ‘O‘zbekiston’ massividan 0,10 ga yer uchastkasi yakka tartibda uy-joy qurish uchun ajratilishi ta’minlandi”, — dedi Zafar Qodirov.
Izoh (0)