Андижон вилоятининг Бўстон туманида адлия бўлими аралашуви билан бир ярим йил аввал ҳокимият томонидан уйи буздирилган фуқарога уй-жой қуриши учун ер ажратиб берилди. Бу ҳақда «Дарё» мухбири Умиджон Мамарасулов хабар берди.
Бўстон туман адлия бўлими бошлиғи Зафар Қодировнинг маълум қилишича, адлияга фуқаро Х.Ю.дан туман ҳокимининг 2019 йил 16 августдаги қарори ижроси бажарилмаётганлигидан норози бўлиб ёзган шикоят аризаси келиб тушган.
Аниқланишича, 2019 йил май июнь ойларида ушбу фуқаронинг Бўстон тумани, «Чорвадор» маҳалласи Соҳибкор кўчасидаги яшаш хонадонининг бир қисми ҳокимият томонидан давлат ва жамоат эҳтиёжлари учун буздирилиб, жами 2,3 гектар ер майдони давлат ҳисобига ўтказилган. Хонадоннинг бузилган қисми эвазига фуқарога туман ҳокимининг 2019 йил 16 августдаги қарорига асосан «Чорвадор» МФЙ, «Ўзбекистон» массивидан 0,10 га ер участкасини якка тартибда уй-жой қуриш учун ажратиш белгиланган. Бироқ ер ресурслари ва давлат кадастр бўлими ва туман архитектураси томонидан қарор ижроси таъминланмаган.
«Ушбу идора ходимлари бир қатор қонун ҳужжатлари талабларини қўпол равишда бузиб, оқибатда фуқаронинг мулкий ҳуқуқлари поймол бўлишига сабаб бўлган. Аниқланган ҳолатлар юзасидан Бўстон туман ҳокимининг қарори ижросини таъминлаш бўйича туман ер ресурслари ва давлат кадастр бўлимига бажарилиши мажбурий бўлган тақдимнома киритилди. Мазкур тақдимномага асосан фуқаро Х.Ю.га ‘Чорвадор’ МФЙ, ‘Ўзбекистон’ массивидан 0,10 га ер участкаси якка тартибда уй-жой қуриш учун ажратилиши таъминланди», — деди Зафар Қодиров.
Изоҳ (0)