Surxondaryolik yigit TikTok’da tanishgan qizining fotosuratlarini tarqatib yuborish bilan qo‘rqitib, uning akasidan 800 dollar talab qildi. Yigitning aytishicha, u 800 dollarni onasini davolatish uchun sarflamoqchi bo‘lgan. Bu haqda “Bu kun” dasturida xabar qilindi.
Ma’lum qilinishicha, 2021-yil 16-yanvar kuni M. ismli shaxs Urgut tumani bo‘yicha Ichki ishlar organlari faoliyatini muvofiqlashtirish bo‘limiga ariza bilan murojaat qilgan.
Arizachining ma’lum qilishicha, Surxondaryo viloyatida yashovchi A. ismli shaxs unga singlisining fotosuratlari borligini, ushbu fotosuratlarni ijtimoiy tarmoqlarga, xususan, TikTok hamda Instagram’ga tarqatish bilan qo‘rqitgan.
Ushbu suratlarni tarqatmaslik evaziga surxondaryolik yigit qizning akasidan 800 AQSh dollari talab qilgan.
“Qiz bilan TikTok’da tanishdik. Oradan 10—15 kun muddat o‘tgandan keyin telefonda gaplashishni boshladik. Internet orqali bir-birimizga rasmlar jo‘natdik.
Vaqt o‘tib, pul zarur bo‘lib qoldi. Qarzlarim ko‘payib ketdi, onam shifoxonada edi. Keyin qizdan 800 dollar so‘radim. Javob yozmadi, telefon qildim, ko‘tarmadi.
Oradan vaqt o‘tdi. Akasiga aytdim, singlingni sharmanda qilaman, birga tushgan rasmlarimiz bor, pulni ham, qizni ham majbur berasan, dedim”, – deydi ayblanuvchi.
Avvalroq Samarqandda tovlamachi tiktokerlar talab qilingan bir million so‘mni olayotgan vaqtida qo‘lga tushgani, Toshkent metrosida vagon ushlagichlariga oyog‘i bilan osilib turgan yigitning shaxsi aniqlangani hamda Toshkentda o‘tkazilgan “dunyodagi birinchi TikTok bayrami”da yilning eng yaxshi o‘zbekistonlik tiktokerlari taqdirlangani haqida xabar berilgandi.
Izoh (0)