Buxoro viloyati Shofirkon tumani markazi ichimlik suvi tarmoqlarini rekonstruksiya qilishdagi talon-torojlik fosh etildi. Bu haqda “Daryo”ga Bosh prokuratura matbuot xizmati xabar berdi.
Departamentning Shofirkon tuman bo‘limi tomonidan viloyat “Suvinspeksiyasi” va Buxoro shahar Obodonlashtirish boshqarmasi mutaxassislari ishtirokida tuman markazi ichimlik suvi tarmoqlarini rekonstruksiya qilish ishlari bo‘yicha o‘tkazilgan nazorat tadbirida “E.” MChJ rahbarlari hujjatlarga amalda bajarilmagan ishlarni qo‘shib yozish orqali 254,4 million so‘m budjet mablag‘larini o‘zlashtirish yo‘li bilan talon-toroj qilganligi aniqlangan.
Shuningdek, “Suv ta’minoti va oqova suv obyektlari qurilishi bo‘yicha injiniring kompaniyasi” DUK Buxoro viloyat hududiy boshqarmasi mas’ul xodimlari tomonidan ushbu jamiyatga 254,4 million so‘m budjet mablag‘i o‘tkazib berilgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi hamda 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda qurilish firmasi maktabga arzon elektr chiroqlarini o‘rnatish orqali 84 million so‘m budjet mablag‘larini talon-toroj qilgani, qabristonni obodonlashtirishga sarflanishi lozim bo‘lgan pullar talon-toroj qilingani yuzasidan prokuratura holatni o‘rganishni boshlagani to‘g‘risida xabar berilgandi.
Izoh (0)