AQSh Kinoaktyorlari gildiyasi (SAG-AFTRA) Donald Tramp tashkilotni tark etganiga qaramay, uni “jazolashi” mumkin. Bu haqda assotsiatsiya prezidenti, aktrisa Gabriel Karterisga asoslanib “RIA Novosti” xabar bermoqda.
Uning so‘zlariga ko‘ra, Amerikaning sobiq prezidenti gildiya qonunlarining ehtimoliy buzilishiga bag‘ishlangan intizomiy sud majlisidan bir kun oldin “qochib ketgan”. Karterisning fikricha, Tramp protsedurani chetlab o‘tishni xohlagan. Natijada, gildiya rahbariyati sobiq prezident tashkilotga qayta a’zo bo‘lishiga yo‘l qo‘ymaydigan qo‘shimcha choralarni ko‘rishga qaror qildi.
Avvalroq gildiya kengashi Trampga qarshi ayblovlarni, jumladan, Kapitoliyni bosib olishdagi roli bilan bog‘liq, shuningdek, “jurnalistlarni obro‘sizlantirishga va oxir-oqibat tahdid solishga qaratilgan” dezinformatsiya kampaniyasini qo‘llab-quvvatlash uchun ayblovlarni ilgari surgan edi.
Tramp o‘z navbatida 4-fevral kuni Gabriel Karterisga xat yubordi. Unda u tashkilot a’zoligidan chiqishini e’lon qildi va intizomiy sud majlisida chiqarilishi mumkin bo‘lgan xulosalarga ahamiyat bermasligini qo‘shimcha qildi.
Eslatib o‘tamiz, AQSh Kinoaktyorlari gildiyasi – bu 160 mingga yaqin aktyorlar, jurnalistlar va radiostansiyalarning manfaatlarini himoya qiluvchi kasaba uyushma assotsiatsiyasi. Tramp gildiyaning 1989-yildan beri a’zosi bo‘lib kelgan.
Avvalroq Donald Tramp Amerika kinoaktyorlar gildiyasini tark etgani va buning uchun gildiya unga minnatdorchilik birldirgani haqida xabar berilgandi.
Izoh (0)