Samarqandda joylashgan universitet rektoriga telefon qilib, tanishiga chet tili fani bo‘yicha o‘tkazilayotgan imtihondan qoniqarli baho qo‘yishni talab qilgan shaxs ushlandi, deya xabar bermoqda Korrupsiyaga qarshi kurashish agentligi.
Ma’lum qilinishicha, 2021-yilning 21-yanvar kuni Samarqand viloyatida istiqomat qiluvchi fuqaro M.S. ushbu hududdagi oliy ta’lim muassasasi rahbariyatiga qo‘ng‘iroq qiladi.
O‘zini Korrupsiyaga qarshi kurashish agentligi xodimi sifatida tanishtirib, mazkur universitet talabasi, tanishi D.Y. hamda guruhning boshqa 17 nafar talabasiga chet tili fani bo‘yicha o‘tkazilayotgan davlat imtihonidan qoniqarli baho qo‘yishni talab qiladi.
Fuqaroning ushbu noqonuniy talabi oliy ta’lim muassasasi tomonidan qondirilmagach fuqaro M.S. takroran qo‘ng‘iroq qiladi va tahdid qiladi.
Mazkur holat yuzasidan 2021-yilning 29-yanvar kuni Korrupsiyaga qarshi kurashish agentligiga murojaat kelib tushdi.
Shu munosabat bilan Korrupsiyaga qarshi kurashish agentligi hamda tegishli idoralar tomonidan o‘tkazilgan tergovga qadar tekshiruv davomida fuqaro M.S.ning noqonuniy xatti-harakatlari to‘g‘risida olingan dastlabki ma’lumotlar o‘z tasdig‘ini topdi.
Holat yuzasidan 2021-yilning 3-fevral kuni Jinoyat ishlari bo‘yicha Samarqand shahar sudida mazkur ish ko‘rib chiqildi.
Jinoyat ishlari bo‘yicha Samarqand shahar sudining qarori bilan fuqarolar M.S. va D.Y. Ma’muriy javobgarlik to‘g‘risidagi kodeksning 197-5-moddasi 1-qismi (ta’lim muassasasi pedagog xodimining kasbiy faoliyatiga qonunga xilof ravishda aralashish yoki o‘z xizmat vazifalarini bajarishiga to‘sqinlik qilish) bilan aybli deb topilib, tegishli jazo tayinlandi.
Avvalroq Qashqadaryoda Janubiy Koreyaga jo‘natishini aytib fuqarolardan 9500 dollar olgan shaxs, Toshkentda 9 yoshli qizning telefonini tortib olib, uni sotib yuborgan juftlik hamda Buxoroda korxona rahbarlarini qo‘rqitib, 30 ming dollar talab qilgan ishchilar ushlangani haqida xabar berilgandi.
Izoh (0)