АҚШ Киноактёрлари гильдияси ташкилотдан «қочиб кетгани» учун Трампни жазоламоқчи

АҚШ Киноактёрлари гильдияси (SAG-AFTRA) Дональд Трамп ташкилотни тарк этганига қарамай, уни «жазолаши» мумкин. Бу ҳақда ассоциация президенти, актриса Габриель Картерисга асосланиб «РИА Новости» хабар бермоқда.

Унинг сўзларига кўра, Американинг собиқ президенти гильдия қонунларининг эҳтимолий бузилишига бағишланган интизомий суд мажлисидан бир кун олдин «қочиб кетган». Картериснинг фикрича, Трамп процедурани четлаб ўтишни хоҳлаган. Натижада, гильдия раҳбарияти собиқ президент ташкилотга қайта аъзо бўлишига йўл қўймайдиган қўшимча чораларни кўришга қарор қилди.

Аввалроқ гильдия кенгаши Трампга қарши айбловларни, жумладан, Капитолийни босиб олишдаги роли билан боғлиқ, шунингдек, «журналистларни обрўсизлантиришга ва охир-оқибат таҳдид солишга қаратилган» дезинформация кампаниясини қўллаб-қувватлаш учун айбловларни илгари сурган эди.

Трамп ўз навбатида 4 февраль куни Габриель Картерисга хат юборди. Унда у ташкилот аъзолигидан чиқишини эълон қилди ва интизомий суд мажлисида чиқарилиши мумкин бўлган хулосаларга аҳамият бермаслигини қўшимча қилди.

Эслатиб ўтамиз, АҚШ Киноактёрлари гильдияси – бу 160 мингга яқин актёрлар, журналистлар ва радиостанцияларнинг манфаатларини ҳимоя қилувчи касаба уюшма ассоциацияси. Трамп гильдиянинг 1989 йилдан бери аъзоси бўлиб келган.

Аввалроқ Дональд Трамп Америка киноактёрлар гильдиясини тарк этгани ва бунинг учун гильдия унга миннатдорчилик бирлдиргани ҳақида хабар берилганди.