Internet tarmog‘ida 3-fevral kuni “‘Azon.uz’ga bosim qachon tugaydi?” nomli bayonot orqali mazkur veb-saytning bosh muharriri Abdulaziz Raimov tahririyatga nisbatan bosim o‘tkazilgani sababli egallab turgan lavozimidan ozod etish bo‘yicha ariza bergani e’lon qilindi va bu holat jamoatchilik orasida muhokamalarga sabab bo‘ldi.
Abdulaziz Raimovning ma’lum qilishicha, Din ishlari bo‘yicha qo‘mita raisining o‘rinbosari Dilshod Eshnayev saytda e’lon qilingan ikki maqola (“Qorilar mahallasi – Prezidentning taklifi ahli ilmlarni to‘lqinlantirib yubordi” hamda “Shavkat Mirziyoyev diniy sohada qanday erkinliklarni qaytardi?”) bo‘yicha muassis Mubashshir Ahmadga qo‘ng‘iroq qilib, yuqoridagi maqolalar uchun juda qattiq haqorat va tahdid qilgan. Shundan so‘ng Abdulaziz Raimov maqolalarni o‘chirishdan bosh tortgan va ishdan bo‘shash uchun ariza yozgan.
Abdulaziz Raimovning qo‘shimcha qilishicha, avvallari olib tashlangan bir necha maqolalar ham aynan Dilshod Eshnayevning qo‘ng‘iroqlari orqasidan o‘chirilgan.
AOKA holat yuzasidan rasmiy bayonot e’lon qildi.
“O‘zbekistonning yangi ochiqlik va oshkoralik siyosatida davlat idoralari va jurnalistlar o‘rtasidagi bahsli masalalar imkon qadar o‘zaro kelishuv, agarda buning iloji topilmasa, huquqiy me’yorlardagi tartiblar asosida hal etilishi maqsadga muvofiqdir.
Xususan, diniy mazmundagi materiallarni tayyorlash va tarqatishda nizoli holatlar yuzaga kelganda ham masalaning yechimi sud orqali hal etilishi belgilangan”, – deyiladi AOKA bayonotida.
Ta’kidlanishicha, agentlik doimgidek davlat organlari va ommaviy axborot vositalarini qonunchilikda ko‘rsatib o‘tilgan qoidalar hamda o‘rnatilgan talablarni hurmat qilgan holda o‘zaro munosabatlarga kirishishga chaqiradi. Shuningdek, davlat idoralarini jurnalistlarga nisbatan bosim o‘tkazmaslik, tahririyat xodimlarini esa jurnalistlik odob-axloq qoidalariga amal qilishini so‘ragan.
Eslatib o‘tamiz, noyabr oyida AOKA “Kun.uz”ga gaz-svet muammosini yozgani uchun ogohlantirish xati yuborgani edi. Buni tahririyat “bosim o‘tkazish” degandi. Bundan tashqari, yana bir ogohlantirish xati “Daryo.uz” internet nashriga yuborilgan. Shuningdek, AOKA COVID-19 statistikasi bo‘yicha yangilik sababli “Gazeta.uz”ni ogohlantirganida nashr bunga javoban “Biz ogohlantirish xatiga tahririyatni noqulay savollar berishdan to‘xtashga majbur qilishga urinishni eslatadigan keskin javob deb qaraymiz”, deya yozgan edi.
Shundan so‘ng Axborot va ommaviy kommunikatsiyalar agentligi mahalliy ommaviy axborot vositalariga yuborilayotgan ogohlantirish xatlari bo‘yicha rasmiy bayonot berdi. Unda agentlik jurnalist va blogerlarga davlat organlarining OAV bilan konstruktiv va ochiq muloqotda bo‘lishlari uchun har tomonlama amaliy yordam ko‘rsatishga tayyorligini bildirdi, shuningdek, mamlakatda so‘z erkinligi va ommaviy axborot vositalari rivojlanishini ta’minlashni kafolatlashini ta’kidladi.
Izoh (0)