Shakira va Jerar Pike: 10 yil farq bilan bir kunda tug‘ilgan yulduzli juftlikning sevgi hikoyasi (foto)

Eng chiroyli va havas qiladigan yulduzli juflik tug‘ilgan kunini ham bir kunda nishonlaydi. Shakira 44, Jerar esa 34 yoshda. Ularning sevgi hikoyasi qanday boshlangani esa hammaga qiziq.

Shakira Kolumbiyada, badavlat oilada dunyoga kelgan. U 4 yoshidayoq she’rlar yozgan va raqsga tushishga qiziqqan. Ammo uning yana bir sevimli mashg‘uloti ham bo‘lgan − bu musiqa edi.

U tez-tez turli xil tanlov va festivallarda qatnashgan, teatr jurnalisti Monika Ariza bilan tanishgan.

Aynan shu tanishuv xonandaning katta sahnaga chiqishiga va shou-biznes olamiga kirib borishiga yordam bergan. Ko‘p o‘tmay, Shakira o‘zi yozgan qo‘shiqlarni jamlab, ilk musiqiy “Magia” albomini taqdim etgan.

Dastlab Shakira faqatgina o‘z vatanida mashhurlikka erishgan, biroq xonanda bu bilan cheklanib qolmagan.

Ijrochining ona tilidagi qo‘shiqlari ommalasha boshlagan. O‘tgan asrning 90-yillarida esa ispan tilidagi qo‘shiqlar amerikalik musiqa ixlosmandlarini qiziqtirib qo‘ygan.

Ilk konsert dasturini esa Nyu-Yorkdagi Manxetten markazida taqdim etgan.

Ushbu dastur uchun xonanda “Gremmi” mukofotining ikki nominatsiyasi bo‘yicha g‘oliblikni qo‘lga kiritgan. Shundan so‘ng u Amerika va Yevropani zabt etish uchun ingliz tilida kuylashi kerakligini tushungan.

Bir necha yil davomida u yangi albom ustida ish olib borib, 2001-yilda ingliz tilidagi “Whenever, Wherever” taronasini taqdim etgan va u darhol mashhurlikka erishgan.

Oradan bir necha oy o‘tib, u “Laundry Service” albomini taqdim etgan va u ham xitga aylangan.

So‘nggi 20 yil ichidan Shakira ko‘plab marralarni zabt etdi va asosiy maqsadlariga erishdi. Bugungi kunda u 2 ta “Gremmi”, 8 ta “Latin Grammy Awards”, 7 ta “Billboard Music Awards”, 5 ta MTV Video Music Awards va “Oltin Globus” mukofotlariga sazovor bo‘lgan.

Ijodiy yuksalish davrida Shakira Argentina sobiq prezidentining o‘g‘li, advokat Antonio de la Ruaning ko‘nglidan joy olgan edi. Shuningdek, u xonandaning ayrim kliplarida ham ko‘rinish bergan. Ma’lumotlarga ko‘ra, Antonio xonandani qattiq rashk qilgan va ayrim kliplariga qarshi ham chiqqan.

O‘zaro munosabatlar boshlanganidan 1 yil o‘tib, advokat Shakiraning qo‘lini so‘ragan. Ammo xonanda unga turmushga chiqishga shoshilmagan. Lekin yigitning yordamini bajonidil qabul qilgan.

Shakira ketma-ket albomlar taqdimoti, dunyo bo‘ylab ijodiy safarlardan so‘ng karyerasida biroz tanaffus qilishni ma’lum qilgan. Muxlislar xonandaning oila borasida qandaydir yangilik qilishini kutayotgan edi, chunki xonanda va advokat o‘rtasidagi munosabatlar 10 yildan buyon davom etayotgan edi.

Biroq, kutilmaganda sevgi uchburchagi paydo bo‘lgan. Shuning uchun ham Antonio va Shakira oila qurmagan va tez orada ularning ayrilgani haqidagi ma’lumotlar tarqalgan. Keyinchalik ma’lum bo‘lishicha, uchinchi shaxs sifatida Jerar Pike ishtirok etgan.

2010-yilda Shakiraga Janubiy Afrikadagi Jahon chempionati madhiyasini yozish taklif qilingan. Shu bilan birga, “Waka Waka” qo‘shig‘iga klip ham suratga olingan. Unda turli xil terma jamoalarning futbolchilari ishtirok etgan. Ular orasida Ispaniya terma jamoasi himoyachisi Jerar Pike ham bor edi.

“Bu Xudoning ajoyib mo‘jizasi edi! Men ikki o‘g‘lim uchun ham futboldan qarzdorman. Usiz menga 2010-yilgi Jahon chempionati madhiyasi ham, Jerar o‘ynagan “Waka Waka” taronasi ham bo‘lmas edi. Albatta, uchrashishimiz uchun yana ko‘p narsalar bo‘lishi kerak edi”,  − deydi xonanda. Oradan ko‘p o‘tmay, xonanda Ispaniya jamoasining o‘yinlarida ko‘rinib turgan va yoshlarning ishqiy munosabati haqida mish-mishlar paydo bo‘lgan.

Xonanda bu boradagi savollarga hazil bilan u haqiqatan ham sevib qolganini, faqat Ispaniya futbolchilari o‘yiniga nisbatan javob berganini aytgan. Jerar ham bunga oydinlik kiritishdan qochib, Shakira bilan shunchaki do‘st bo‘lganini ta’kidlagan.

Ammo shamol bo‘lmasa daraxtning uchi qimirlamaydi. Chempionat tugaganidan so‘ng Shakira Antonio bilan ajrashganini e’lon qilgan, bu esa qo‘shiqchi va sportchi o‘rtasidagi mumkin bo‘lgan ishqiy munosabatlar haqidagi mish-mishlarni yanada kuchaytirgan.

“Antonio hanuzgacha mening biznesim va manfaatlarimni himoya qiladi. Biz ajrashishni vaqtinchalik deb bilamiz, individual o‘sish uchun vaqt kerak”,  − degandi o‘sha vaqtda Shakira.

O‘tgan vaqt mobaynida juftlik o‘z munosabatini yashirishga harakat qilmasin, omma tomonidan tinimsiz savollar berilar edi. Va nihoyat, Shakira o‘z sahifasiga Jerarning suratini joylashtirgan va shunday yozgan: “Men sizga o‘z quyoshimni taqdim etaman”.

“Men o‘zgardim, ham qo‘shiqchi, ham ayol sifatida. Hayotim, sevgim, martaba  − hech narsa avvalgidek emas. Men yanada baxtliman!”,  − deya ta’kidlaydi Shakira.

O‘zaro munosabatlar yaxshi bo‘lishiga qaramay, tez orada sevishganlarning ajralishi haqidagi mish-mishlar paydo bo‘ldi. Biroq yomon niyatli insonlarning bashorati amalga oshmadi, xonanda va futbolchi yana birgalikda omma oldida ko‘rinish bergan. 2013-yilda esa juftlikning birinchi farzandi dunyoga kelgan.

“Biz kecha, 22-yanvar kuni soat 21:25 da Ispaniyaning Barselona shahrida Shakira Mebarak va Jerar Pikening o‘g‘li Milan Mebarak Pike dunyoga kelganini e’lon qilishdan mamnunmiz”,  − degan xabar paydo bo‘lgan. Bolaga Milan, deb ism berilgan va ijtimoiy tarmoqlarga suratlari joylashtirilgan.

Juftlik imkon qadar farzandlarining yonida bo‘lishga harakat qiladi, shuning uchun ham ularni futbol o‘yinlariga olib boradi. 2015-yilda ularning oilasida Sasha ismli ikkinchi o‘g‘il dunyoga kelgan. Shakiraning so‘zlariga ko‘ra, u hayotidan juda mamnun va Jerarga 8-9 ta farzand tug‘ib, haqiqiy futbol jamoasini tuzishni orzu qiladi.

“Jerar bilan juda o‘xshashmiz. Biz tom ma’noda bir xilmiz. Bir xil narsalar yoqadi, bir xil narsadan nafratlanamiz. Hamma hissiyotlar biz xilda zarur”,  − deydi xonanda. Juftlikning ikki farzandi va baxtli oilasi bo‘lishiga qaramay, ular rasmiy ravishda er-xotin bo‘lishga va pasportga muhr urishga shoshilmayapti. “Ba’zida shunday tuyiladi, Jerar bilan oramizda hech qanday farq yo‘q.  Men hech qachon atrofdagi odamlar bilan hamjihat bo‘lgan bu kabi insonni uchratmaganman”,  − deya xulosa qiladi Shakira.