Шакира ва Жерар Пике: 10 йил фарқ билан бир кунда туғилган юлдузли жуфтликнинг севги ҳикояси (фото)

Энг чиройли ва ҳавас қиладиган юлдузли жуфлик туғилган кунини ҳам бир кунда нишонлайди. Шакира 44, Жерар эса 34 ёшда. Уларнинг севги ҳикояси қандай бошлангани эса ҳаммага қизиқ.

Шакира Колумбияда, бадавлат оилада дунёга келган. У 4 ёшидаёқ шеърлар ёзган ва рақсга тушишга қизиққан. Аммо унинг яна бир севимли машғулоти ҳам бўлган − бу мусиқа эди.

У тез-тез турли хил танлов ва фестивалларда қатнашган, театр журналисти Моника Ариза билан танишган.

Айнан шу танишув хонанданинг катта саҳнага чиқишига ва шоу-бизнес оламига кириб боришига ёрдам берган. Кўп ўтмай, Шакира ўзи ёзган қўшиқларни жамлаб, илк мусиқий «Magia» альбомини тақдим этган.

Дастлаб Шакира фақатгина ўз ватанида машҳурликка эришган, бироқ хонанда бу билан чекланиб қолмаган.

Ижрочининг она тилидаги қўшиқлари оммалаша бошлаган. Ўтган асрнинг 90 йилларида эса испан тилидаги қўшиқлар америкалик мусиқа ихлосмандларини қизиқтириб қўйган.

Илк концерт дастурини эса Нью-Йоркдаги Манхэттен марказида тақдим этган.

Ушбу дастур учун хонанда «Гремми» мукофотининг икки номинацияси бўйича ғолибликни қўлга киритган. Шундан сўнг у Америка ва Европани забт этиш учун инглиз тилида куйлаши кераклигини тушунган.

Бир неча йил давомида у янги альбом устида иш олиб бориб, 2001 йилда инглиз тилидаги «Whenever, Wherever» таронасини тақдим этган ва у дарҳол машҳурликка эришган.

Орадан бир неча ой ўтиб, у «Laundry Service» альбомини тақдим этган ва у ҳам хитга айланган.

Сўнгги 20 йил ичидан Шакира кўплаб марраларни забт этди ва асосий мақсадларига эришди. Бугунги кунда у 2 та «Gremmi», 8 та «Latin Grammy Awards», 7 та «Billboard Music Awards», 5 та MTV Video Music Awards ва «Олтин Глобус» мукофотларига сазовор бўлган.

Ижодий юксалиш даврида Шакира Аргентина собиқ президентининг ўғли, адвокат Антонио де ла Руанинг кўнглидан жой олган эди. Шунингдек, у хонанданинг айрим клипларида ҳам кўриниш берган. Маълумотларга кўра, Антонио хонандани қаттиқ рашк қилган ва айрим клипларига қарши ҳам чиққан.

Ўзаро муносабатлар бошланганидан 1 йил ўтиб, адвокат Шакиранинг қўлини сўраган. Аммо хонанда унга турмушга чиқишга шошилмаган. Лекин йигитнинг ёрдамини бажонидил қабул қилган.

Шакира кетма-кет альбомлар тақдимоти, дунё бўйлаб ижодий сафарлардан сўнг карьерасида бироз танаффус қилишни маълум қилган. Мухлислар хонанданинг оила борасида қандайдир янгилик қилишини кутаётган эди, чунки хонанда ва адвокат ўртасидаги муносабатлар 10 йилдан буён давом этаётган эди.

Бироқ кутилмаганда севги учбурчаги пайдо бўлган. Шунинг учун ҳам Антонио ва Шакира оила қурмаган ва тез орада уларнинг айрилгани ҳақидаги маълумотлар тарқалган. Кейинчалик маълум бўлишича, учинчи шахс сифатида Жерар Пике иштирок этган.

2010 йилда Шакирага Жанубий Африкадаги Жаҳон чемпионати мадҳиясини ёзиш таклиф қилинган. Шу билан бирга, «Waka Waka» қўшиғига клип ҳам суратга олинган. Унда турли хил терма жамоаларнинг футболчилари иштирок этган. Улар орасида Испания терма жамоаси ҳимоячиси Жерар Пике ҳам бор эди.

«Бу Худонинг ажойиб мўъжизаси эди! Мен икки ўғлим учун ҳам футболдан қарздорман. Усиз менга 2010 йилги Жаҳон чемпионати мадҳияси ҳам, Жерар ўйнаган «Waka Waka» таронаси ҳам бўлмас эди. Албатта, учрашишимиз учун яна кўп нарсалар бўлиши керак эди», − дейди хонанда. Орадан кўп ўтмай, хонанда Испания жамоасининг ўйинларида кўриниб турган ва ёшларнинг ишқий муносабати ҳақида миш-мишлар пайдо бўлган.

Хонанда бу борадаги саволларга ҳазил билан у ҳақиқатан ҳам севиб қолганини, фақат Испания футболчилари ўйинига нисбатан жавоб берганини айтган. Жерар ҳам бунга ойдинлик киритишдан қочиб, Шакира билан шунчаки дўст бўлганини таъкидлаган.

Аммо шамол бўлмаса дарахтнинг учи қимирламайди. Чемпионат тугаганидан сўнг Шакира Антонио билан ажрашганини эълон қилган, бу эса қўшиқчи ва спортчи ўртасидаги мумкин бўлган ишқий муносабатлар ҳақидаги миш-мишларни янада кучайтирган.

«Антонио ҳанузгача менинг бизнесим ва манфаатларимни ҳимоя қилади. Биз ажрашишни вақтинчалик деб биламиз, индивидуал ўсиш учун вақт керак», − деганди ўша вақтда Шакира.

Ўтган вақт мобайнида жуфтлик ўз муносабатини яширишга ҳаракат қилмасин, омма томонидан тинимсиз саволлар берилар эди. Ва ниҳоят, Шакира ўз саҳифасига Жерарнинг суратини жойлаштирган ва шундай ёзган: «Мен сизга ўз қуёшимни тақдим этаман».

«Мен ўзгардим, ҳам қўшиқчи, ҳам аёл сифатида. Ҳаётим, севгим, мартаба − ҳеч нарса аввалгидек эмас. Мен янада бахтлиман!», − дея таъкидлайди Шакира.

Ўзаро муносабатлар яхши бўлишига қарамай, тез орада севишганларнинг ажралиши ҳақидаги миш-мишлар пайдо бўлди. Бироқ ёмон ниятли инсонларнинг башорати амалга ошмади, хонанда ва футболчи яна биргаликда омма олдида кўриниш берган. 2013 йилда эса жуфтликнинг биринчи фарзанди дунёга келган.

«Биз кеча, 22 январь куни соат 21:25 да Испаниянинг Барселона шаҳрида Шакира Мебарак ва Жерар Пикенинг ўғли Милан Мебарак Пике дунёга келганини эълон қилишдан мамнунмиз», − деган хабар пайдо бўлган. Болага Милан, деб исм берилган ва ижтимоий тармоқларга суратлари жойлаштирилган.

Жуфтлик имкон қадар фарзандларининг ёнида бўлишга ҳаракат қилади, шунинг учун ҳам уларни футбол ўйинларига олиб боради. 2015 йилда уларнинг оиласида Саша исмли иккинчи ўғил дунёга келган. Шакиранинг сўзларига кўра, у ҳаётидан жуда мамнун ва Жерарга 8-9 та фарзанд туғиб, ҳақиқий футбол жамоасини тузишни орзу қилади.

«Жерар билан жуда ўхшашмиз. Биз том маънода бир хилмиз. Бир хил нарсалар ёқади, бир хил нарсадан нафратланамиз. Ҳамма ҳиссиётлар биз хилда зарур», − дейди хонанда. Жуфтликнинг икки фарзанди ва бахтли оиласи бўлишига қарамай, улар расмий равишда эр-хотин бўлишга ва паспортга муҳр уришга шошилмаяпти. «Баъзида шундай туйилади, Жерар билан орамизда ҳеч қандай фарқ йўқ. Мен ҳеч қачон атрофдаги одамлар билан ҳамжиҳат бўлган бу каби инсонни учратмаганман», − дея хулоса қилади Шакира.