O‘zbekiston bosh vaziri Abdulla Aripov Ulug‘bek Maripovni Qirg‘iziston bosh vaziri etib tayinlangani bilan tabrikladi. Bu haqda bosh vazir matbuot xizmatiga tayanib, UzReport-TV xabar berdi.
Ma’lum qilinishicha, O‘zbekiston bosh vaziri Abdulla Aripov 3-fevral kuni 41 yoshli Ulug‘bek Maripovga Qirg‘iziston bosh vaziri etib tayinlangani munosabati bilan tabrik maktubini yo‘llagan.
Kloop’ning yozishicha, Ulug‘bek Maripov hisob bo‘yicha mustaqil bo‘lganiga hali 30 yil to‘lmagan Qirg‘iziston tarixidagi 32-bosh vazirga aylangan. Mamlakat bosh vazirlarining aksariyati jinoyat ishiga aloqador bo‘lgan va hibsga olingan. Faqat 12 nafar Qirg‘iziston bosh vaziriga nisbatan lavozimdagi faoliyati davomida jinoyat ishi ochilmagan.
Qirg‘iziston prezidenti Sadir Japarov mamlakatning yangi hukumati tarkibini ham tasdiqlagan. Qirg‘iziston parlamenti qaroriga ko‘ra, avvalgi hukumatdan bosh vazir birinchi o‘rinbosari Artyom Novikov, Milliy xavfsizlik davlat qo‘mitasi raisi Qamchibek Tashiyev va tashqi ishlar vaziri Ruslan Kazakbayev o‘z lavozimlarini saqlab qolgan.
Izoh (0)