“Azon.uz” bosh muharriri Din ishlari bo‘yicha qo‘mita tomonidan tahririyatga nisbatan bosim o‘tkazilgani va saytda e’lon qilingan ayrim maqolalarni o‘chirishni talab qilgani sababli ishdan bo‘shaganini e’lon qilgandi. Din ishlari bo‘yicha qo‘mita matbuot xizmati “Azon.uz” tahririyatiga bosim o‘tkazmaganini ma’lum qildi.
Qo‘mitaning 4-fevral kuni e’lon qilgan bayonotida aytilishicha, ushbu saytda e’lon qilingan muayyan maqolalarni oldirib tashlash bo‘yicha qo‘mita rahbariyati tomonidan hech qanday topshiriq bo‘lmagan.
Shuningdek, Din ishlari bo‘yicha qo‘mita qator OAVlari bilan doimiy hamkorlikda faoliyat olib borayotganini, Prezident boshchiligida diniy-ma’rifiy sohada amalga oshirilayotgan yangilik va o‘zgarishlarni birgalikda omma e’tiboriga havola qilayotganini alohida qayd etgan.
Eslatib o‘tamiz, internet tarmog‘ida 3-fevral kuni “ ‘Azon.uz’ga bosim qachon tugaydi?” nomli bayonot orqali mazkur saytning bosh muharriri Abdulaziz Raimov tahririyatga nisbatan bosim o‘tkazilgani sababli egallab turgan lavozimidan ozod etish bo‘yicha ariza bergani e’lon qilindi va bu holat jamoatchilik orasida muhokamalarga sabab bo‘ldi.
Abdulaziz Raimovning ma’lum qilishicha, Din ishlari bo‘yicha qo‘mita raisining o‘rinbosari Dilshod Eshnayev saytda e’lon qilingan ikki maqola (“Qorilar mahallasi – Prezidentning taklifi ahli ilmlarni to‘lqinlantirib yubordi” hamda “Shavkat Mirziyoyev diniy sohada qanday erkinliklarni qaytardi?”) bo‘yicha muassis Mubashshir Ahmadga qo‘ng‘iroq qilib, yuqoridagi maqolalar uchun juda qattiq haqorat va tahdid qilgan. Shundan so‘ng Abdulaziz Raimov maqolalarni o‘chirishdan bosh tortgan va ishdan bo‘shash uchun ariza yozgan.
Abdulaziz Raimovning qo‘shimcha qilishicha, avvallari olib tashlangan bir necha maqolalar ham aynan Dilshod Eshnayevning qo‘ng‘iroqlari orqasidan o‘chirilgan.
AOKA holat yuzasidan rasmiy bayonot bildirib, diniy mazmundagi materiallarni tayyorlash va tarqatishda nizoli holatlar yuzaga kelganda ham masalaning yechimi sud orqali hal etilishi belgilanganini aytib o‘tdi.
Agentlik doimgidek davlat organlari va ommaviy axborot vositalarini qonunchilikda ko‘rsatib o‘tilgan qoidalar hamda o‘rnatilgan talablarni hurmat qilgan holda o‘zaro munosabatlarga kirishishga chaqirgan. Shuningdek, davlat idoralarini jurnalistlarga nisbatan bosim o‘tkazmaslik, tahririyat xodimlarini esa jurnalistlik odob-axloq qoidalariga amal qilishini so‘ragan.
Izoh (0)