Toshkent viloyatining Yangiyo‘l shahridagi 6-maktab sinfxonalarining birida shift ko‘chib tushib, ikki o‘quvchi jarohatlandi. Ularga zudlik bilan tibbiy yordam ko‘rsatildi.
Xalq ta’lim vazirligi matbuot xizmatining xabar berishicha, mazkur maktabdagi mukammal ta’mirlash ishlari 2019-yilda Toshkent viloyati buyurtmasiga asosan viloyatga ajratilgan qo‘shimcha 3,3 milliard so‘m mablag‘ evaziga “Ahmadxoji al-Avaz” MChJ tomonidan amalga oshirilgan.
Ayni damda shahar hokimining topshirig‘iga ko‘ra shahar prokuraturasi, xalq ta’limi bo‘limi mudiri, qurilish tashkiloti bilan birgalikda maktabni shift qismlarining chidamliligini qayta tekshiruvdan o‘tkazilmoqda.
“Kelgusida bu kabi noxush holatlarning oldini olish maqsadida barcha viloyatlardagi qurilish bo‘yicha mutasaddilar hamda quruvchi tashkilotlardan maktablardagi qurilish va ta’mirlash ishlariga mas’uliyat bilan yondoshishni, uning sifat jihatiga alohida e’tibor bergan holda maktabni kelgusida bolalar ekspluatatsiyasi uchun xavfsiz holda topshirishni so‘rab qolamiz”, — deyiladi vazirlik xabarida.
2020-yilning oktabr oyida Navoiyda 4 milliard so‘mga qurilgan bolalar bog‘chasi 8 oy o‘tib ta’mirtalab ahvolga kelgani haqida xabar berilgan edi.
Prezidentning “2021–2023-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi qaroriga ko‘ra, O‘zbekistonda 22 ta bog‘cha, 31 ta maktab va 16 ta OTM quriladi.
Izoh (0)