Belarus olimlari saratonning ayrim turlari COVID-19 infeksiyasidan himoya qilishi mumkinligini aniqladi
Belarus onkologlari garchi saratonga chalingan bemorlar COVID-19’ga chalinish ehtimoli yuqori bo‘lgan qatlamga kirishiga qaramay, kasallikning ayrim turlari bilan og‘rigan kishilarning koronavirus infeksiyasiga chalinish ehtimoli past bo‘lishini aniqladi. Bu haqda “Interfaks” xabar qildi.
“Biz saratonga chalingan bemorlar sog‘lig‘idagi muammolar, holsizlik tufayli koronavirus yuqtirib olish ehtimoli yuqori bo‘lgan kishilar sirasiga kiradi deb taxmin qilgandik. Lekin ayrim zararli o‘simtalarda COVID-19’ga chalinish ancha kam uchraydi”, – degan Belarus onkologiya va tibbiy radiologiya ilmiy-amaliy markazi direktor o‘rinbosari Sergey Krasniy.
U misol tariqasida limfom bilan og‘rigan ayrim bemorlarda uchragan holatni keltirib o‘tgan. Ularni qon tarkibidagi limfotsitlar koronavirusdan himoya qilishi mumkinligi taxmin qilinmoqda. Shuningdek, jiddiy gormonal va o‘simtaga qarshi terapiya muolajasini olgan bemorlar, saratonning 4-bosqichidagi kishilarda ham COVID-19’ga chalinish holatlari kam kuzatilgan.
“Bunday bemorlar kuzatuvlarimizga ko‘ra koronavirusga boshqalarga nisbatan kamroq chalinmoqda”, – degan Krasniy.
Olim Belarusda koronavirus pandemiyasi davrida ham onkologik xizmatlar bemorlarni odatiy ish tarzi bo‘yicha me’yoriy hajmda qabul qilganini bildirgan. Statsionar davolanishga yotishdan avval bemorlar PZR-test topshirgan, kasalxonaga kelgach esa tomografiya qilingan.
“Ayrim holatlarda manfiy deb topilgan tahlillarga qaramay, bemorlarda pnevmoniya boshlanganiga guvoh bo‘ldik”, – degan mutaxassis.
Belarus onkologlari saratonga chalingan bemorlarni emlash borasida yakuniy javob berishga shoshilmayapti. Sababi mazkur masala qo‘shimcha o‘rganishlar va maxsus tadqiqotlar o‘tkazishni talab etadi. Shunga qaramay Krasniy remissiya holatidagi va vaksinatsiya uchun tavsiya qilinmaydigan bemorlar sog‘lig‘i ustidan tavakkal qilish noto‘g‘ri ekanligini ta’kidlagan.
