O‘zbekistonda 2020-yil davomida ichimlik suv tarmoqlarida sodir bo‘lgan jami 140,4 mingta avariya va nosozliklarni bartaraf etishga 19,8 milliard so‘m mablag‘ sarflangan. Bu “O‘zsuvta’minot” boshqaruvi raisining birinchi o‘rinbosari Tohir Haydarovga asoslanib “Kun.uz” xabar qildi.
Ta’kidlanishicha, O‘zbekistondagi jami 70,4 ming kilometrdan ziyod ichimlik suv quvurlarining 26,9 ming kilometri (38 foizi), 9,3 mingta ichimlik suv tozalash inshootlaridan 3,5 mingtasi (38 foizi), 58 ta oqova suv tozalash inshootlaridan 49 tasi (84 foizi) ta’mirtalab ahvolga kelib qolgan.
Shuningdek, 2020-yil davomida ichimlik suv tarmoqlarida sodir bo‘lgan jami 140,4 mingta avariya va nosozliklar bartaraf etilib, bunga 19,8 milliard so‘m mablag‘ sarflangan. Bugungi kunda avariya holatlari sodir bo‘lishining asosiy sabablaridan biri – Toshkent shahrida 10 475 ta ko‘p qavatli uylar mavjud bo‘lib, 2017–2019-yillarda 855 ta, 2020-yilda 302 ta yangi ko‘p qavatli uylar qurilgan.
Tohir Haydarovning ta’kidlashicha, qurilayotgan uylar asosan 7 va undan yuqori qavatli bo‘lib, ushbu uylarning tepa qavatlarini ichimlik suvi bilan ta’minlashda nasos stansiyalaridan foydalanilmoqda. Bu esa, o‘z navbatida, ichimlik suvi tarmoqlarida bosim ko‘tarilib, tarmoqlar zo‘riqqan holda ishlashi bilan bir qatorda, suv ta’minoti korxonalarining qo‘shimcha xarajatlari oshishiga sabab bo‘lmoqda.
Avvalroq Andijondagi markaziy ichimlik suvi quvuri nima sababdan yorilgani ma’lum bo‘lgani, Olot va Qorako‘l tumanlarida ichimlik suvi ta’minoti 90 foizga yetkazilishi hamda O‘zbekiston hududlari kesimida ichimlik suvi va oqova xizmatlari bo‘yicha yangi tariflar e’lon qilingani haqida xabar berilgandi.
Izoh (0)