Ўзбекистонда 2020 йил давомида ичимлик сув тармоқларида содир бўлган жами 140,4 мингта авария ва носозликларни бартараф этишга 19,8 миллиард сўм маблағ сарфланган. Бу «Ўзсувтаъминот» бошқаруви раисининг биринчи ўринбосари Тоҳир Ҳайдаровга асосланиб «Kun.uz» хабар қилди.
Таъкидланишича, Ўзбекистондаги жами 70,4 минг километрдан зиёд ичимлик сув қувурларининг 26,9 минг километри (38 фоизи), 9,3 мингта ичимлик сув тозалаш иншоотларидан 3,5 мингтаси (38 фоизи), 58 та оқова сув тозалаш иншоотларидан 49 таси (84 фоизи) таъмирталаб аҳволга келиб қолган.
Шунингдек, 2020 йил давомида ичимлик сув тармоқларида содир бўлган жами 140,4 мингта авария ва носозликлар бартараф этилиб, бунга 19,8 миллиард сўм маблағ сарфланган. Бугунги кунда авария ҳолатлари содир бўлишининг асосий сабабларидан бири – Тошкент шаҳрида 10 475 та кўп қаватли уйлар мавжуд бўлиб, 2017–2019 йилларда 855 та, 2020 йилда 302 та янги кўп қаватли уйлар қурилган.
Тоҳир Ҳайдаровнинг таъкидлашича, қурилаётган уйлар асосан 7 ва ундан юқори қаватли бўлиб, ушбу уйларнинг тепа қаватларини ичимлик суви билан таъминлашда насос станцияларидан фойдаланилмоқда. Бу эса, ўз навбатида, ичимлик суви тармоқларида босим кўтарилиб, тармоқлар зўриққан ҳолда ишлаши билан бир қаторда, сув таъминоти корхоналарининг қўшимча харажатлари ошишига сабаб бўлмоқда.
Аввалроқ Андижондаги марказий ичимлик суви қувури нима сабабдан ёрилгани маълум бўлгани, Олот ва Қоракўл туманларида ичимлик суви таъминоти 90 фоизга етказилиши ҳамда Ўзбекистон ҳудудлари кесимида ичимлик суви ва оқова хизматлари бўйича янги тарифлар эълон қилингани ҳақида хабар берилганди.
Изоҳ (0)