O‘zbekiston aeroportlarini rivojlantirishga Turkiya kompaniyasi jalb etiladi
Turkiyaning TAV Airports Holding kompaniyasi O‘zbekiston aeroportlarini modernizatsiya qilishda va Toshkentda yangi aeroport qurish loyihasida ishtirok etadi. Bu haqda Anadolu agentligiga tayanib, Spot xabar berdi.
“Sakkizta mamlakatdagi 15 aeroportni boshqarishimizga yordam beradigan nou-xaumizga tayanib, O‘zbekistondagi aeroportlarni rivojlantirish va modernizatsiya qilish ustida ish olib boramiz. Shuningdek, yangi texnologiyalarni joriy etish va inson resurslarini rivojlantirish bo‘yicha hamkorlik qilamiz”, — degan TAV Airports direktori Sani Shener.
Transport vazirligi matbuot xizmatining xabar berishicha, 27-yanvar kuni transport vaziri vazifasini bajaruvchi Ilhom Mahkamov TAV Airports Holding prezidenti Sani Shener bilan O‘zbekiston aeroportlarini rivojlantirish masalalarini muhokama qildi.
Uchrashuvda TAV Airports Holding prezidenti Sani Shener Toshkent xalqaro aeroporti va hududiy aeroportlarni rivojlantirish masalasida hamkorlikda loyihalarini amalga oshirishga tayyor ekanini bildirgan.
Avvalroq O‘zbekistondagi mavjud aeroportlarni “paket prinsipi” (zarar bilan ishlayotgan havo portlarini foyda keltirayotganlari bilan sheriklikka berish) asosida sheriklikka berish boshlanishi xabar berilgan edi.
Shavkat Mirziyoyev 2020-yil 25-may kuni transport sohasining barqaror ishlashini ta’minlash va izchil rivojlantirish masalalari bo‘yicha o‘tkazgan yig‘ilishda aeroportlarni modernizatsiya qilish, Andijon, Buxoro, Urganch va Qarshi xalqaro aeroportlarini davlat-xususiy sheriklikka berish bo‘yicha tender e’lon qilinishi belgilangandi.
