Turkiya Respublikasining Aksa energy kompaniyasi Buxoroda Aksa energy Bukhara issiqlik elektr stansiyasini quradi. Bu haqda “Daryo”ga viloyat hokimligi axborot xizmati rahbari Olim Jo‘rayev xabar berdi.
Ta’kidlanishicha, Aksa energy Bukhara issiqlik elektr stansiyasi loyiha menejerlari — Murad Ustel va Algan Saracho‘g‘li Buxoroga kelib, 270 megavatt kuchlanishga ega issiqlik elektr stansiyasi qurilishiga investitsiya kiritmoqchiligini ma’lum qilgan.
“Loyiha qiymati 150 million dollarga moliyalashtirilayotgan Aksa energy Bukhara kompaniyasi rahbarlari Buxoro hokimi qabulida bo‘lib, viloyat rahbarining mazkur loyiha haqidagi fikri bilan qiziqdi”, — deydi Olim Jo‘rayev.
Olim Jo‘rayevning aytishicha, mazkur loyiha viloyat rahbari tomonidan qo‘llab-quvvatlangan.
“Shu munosabat bilan turkiyalik sarmoyadorlarga Buxoro tumanidan 6 gektar yer maydoni taklif qilindi. Tanlangan yerda issiqlik elektr stansiyasi barpo etish uchun dastlabki infratuzilma — muhandislik-kommunikatsiya tarmoqlari, jumladan, 20 kilometr masofadan tabiiy gaz, 5 kilometr masofadan suv quvurlarini tortib kelishga qaror qilindi”, — deydi viloyat hokimi matbuot kotibi.
Izoh (0)