“Ko‘p qavatli uylarda qo‘shni qo‘shnisini tanimaydi” – Shavkat Mirziyoyev farzand tarbiyasida mahallaning o‘rni va ajrimlar haqida

2021-yilning 19-yanvar kuni Prezident Shavkat Mirziyoyev raisligida o‘tkazilgan yig‘ilishda davlat rahbari yoshlar tarbiyasida jamoatchilikning roli susayib borayotgani barchani jiddiy tashvishga solishi zarurligini ta’kidladi. Bu haqda “Daryo” muxbiri xabar bermoqda.

“Ilgari bir bolaga yetti mahalla ota-ona degan maqolga amal qilib yashardik. O‘g‘il-qizlarimizning axloq-odobi, o‘qishi uchun nafaqat ularning ota-onalari, avvalo, mahalladagi nuroniylar, kayvoni keksalar, ziyolilar ham o‘zini mas’ul va javobgar deb bilardi.

Shuning uchun ham mahallalarimizda urush-janjal, bezorilik, ichkilikbozlik qilib yuradigan yoshlar, oilaviy ajrimlar kam bo‘lar edi. Ajrim bizga yot edi. Shunday mahallalar bor ediki, nuroniyning bir og‘iz gapi bilan hamma narsa hal bo‘lar edi. Lekin hozir yengil-yelpi hayotga o‘tib oldik. Mana, ajrimlarning statistikasini ko‘ringlar. Bu nima degan gap? Qayoqqa boryapmiz?

Keksa avlod vakillari yoshlarni mehnatga, o‘z uyini, ko‘chalar, guzar va maydonlarni ozoda tutishga o‘rgatardi. Bizda bu urf-odat edi. Endi ayrim odamlar hovlisini bolasiga emas, mardikorga tozalattiryapti. Ko‘p qavatli uylarda qo‘shni qo‘shnisini tanimaydi. Bu holda bolalar mehnatni, odobni, ma’naviyatni, mehr-oqibatni kimdan o‘rganadi? Ma’naviyatimiz uchun eng katta xavf – aksariyat odamlarimizdagi loqaydlik va beparvolik kuchayib boryapti”, — dedi Prezident.