Namanganda 21 yashar ona va uning ikki o‘g‘liga tug‘ilganlik haqida guvohnomalar topshirildi. Bu haqda “Daryo”ga DXA viloyat boshqarmasi matbuot xizmati ma’lum qildi.
Mingbuloqlik Madina Bekboyeva shu paytgacha tug‘ilganlik haqida guvohnomasiz yashab kelayotgan edi. Chunki tug‘ruqxonada familiyasi o‘zgartirib yozilgani bois vaqtida guvohnoma ololmagan.
Esini taniboq shaxsini tasdiqlovchi hujjat olish harakati bilan ko‘plab idoralar eshigini taqillatgan. Biroq familiyaga aniqlik kiritish uchun sudga murojaat qilganda xarajatlarni to‘lash uchun sharoiti bo‘lmagan.
Madinaning ta’kidlashicha, unda na maktabni tamomlaganlik to‘g‘risida shahodatnoma, na fuqarolik pasporti bor. Chunki tug‘ilganlik haqida guvohnomasi yo‘qligi uchun hech birini olish imkoni bo‘lmagan. U hujjati yo‘qligi tufayli hatto ishga ham kira olmagan.
Uning murojaati Davlat xizmatlari agentligi Namangan viloyat boshqarmasi tomonidan o‘rganib chiqilib, huquqiy va amaliy ko‘mak berildi. Madinaning tug‘ilganlik guvohnomasi fuqarolik sudi qarori orqali qonuniy hal etildi.
Madina shar’iy nikohdan o‘tib, oila qurgan va ikki farzandni dunyoga keltirgan. Ularga ham tug‘ilganlik guvohnomasini olishda qiyinchilikka uchragan ayol shaxsini tasdiqlovchi hujjatga ega bo‘lganidan so‘ng ikki farzandi —Murodjon va Nursultonga ham tug‘ilganlik haqida guvohnomalar rasmiylashtirdi.
Izoh (0)