Ngolo Kantedan kichik haqiqatlar
— Sizda eng yaxshi taassurot qoldirgan futbolchi kim?
— Braziliyalik Ronaldo. Menda uning gollari yozilgan DVD-kassetasi bor edi. YouTube va shu kabi platformalar paydo bo‘lgach uning harakatlari va texnikasini kuzatishni yaxshi ko‘rardim. U Maradona bilan birga men judayam qadrlagan futbolchi.
— Gollar borasida didliman deya olasizmi?
— Albatta! Futbol bilan shug‘ullanishni kech boshlaganimga qaramay, 10 yoshimda do‘stlarim bilan ko‘p o‘ynaganman. Biz Ronaldo yoki Ronaldinyoning videolarini tomosha qilardik va maydonda ular qilgan harakatlarni takrorlamoqchi bo‘lardik. Tomoshabin sifatida chiroyli o‘yin namoyish etadigan futbolchilarni biz yaxshi ko‘rardik. Ehtimol, men hozir bunday futbolchi emasdirman (kuladi).
— Futbolda sizga yoqadigan harakat qaysi?
— Gol bilan yakunlanadiganlari. Bu uzatma bo‘lishi ham mumkin. Ammo men jamoaga yordam beradigan himoyaviy harakatlarni ham yaxshi ko‘raman. Jamoa uchun foydali bo‘lgan harakatlarni sevishni o‘rgandim.
— Kimga qarshi o‘ynash sizga yoqmaydi?
— Tanishlarim yoki do‘stlarim bilan bellashishni yoqtirmayman.
— Londonda (“Chelsi”da) terma jamoadan (Fransiya) kimni tez-tez uchratasiz?
— Kurt Zuma va Olivye Jiru. Ehtimol, biz klubdan tashqarida ham uchrashishimiz mumkin, ammo bu kamdan kam holatlarda uchraydi, boisi biz har kuni mashg‘ulotlarda bir-birimizni ko‘ramiz.
— Fransiya jamoasining kiyinish xonasida qanday musiqa yangraydi?
— Hammasidan ozginadan bor: amerikacha yoki fransuzcha rep, shuningdek, Lotin Amerikasi musiqasi. Ammo men buni boshqarmayman. Bizning dijeylarimiz Antuan Grizmann va Presnel Kimpembe.
— Sevimli mashg‘ulotingiz nima?
— Men oilam, do‘stlarim bilan vaqt o‘tkazishni yaxshi ko‘raman, sayr qilamiz, PlayStation o‘ynaymiz. Uyim – sevimli maskanim. Men u yerda ko‘p vaqt o‘tkazaman. Yaqinlarim bilan birga tamaddi qilamiz va vaqti-vaqti bilan London bo‘ylab aylanamiz. Bu shaharda o‘zimni yaxshi his qilyapman.
— Film yoki serial?
— Ko‘proq film, lekin seriallarni ham tomosha qilaman. Muammo shundaki, agar serial ko‘rishni boshlasam, uni oxirigacha yetkazaman.
— Agar futbolchi bo‘lmaganingizda…
— Buxgalteriya hisobini o‘rganganman, shuning uchun o‘qishni davom ettirib, hisobchi bo‘lardim. Bu men xohlagan narsa emas, lekin bu o‘tmishim, 21 yoshimda “Bulon”ning asosiy jamoasiga o‘tib, o‘qishni tashlaganman.
— Sizda futbolga bo‘lgan ishtiyoqni kim vujudga keltirgan?
— Akam va uning do‘stlari, keyin maktabdagi do‘stlarim hamda bizning hududdagilar.
— O‘yinlaringizni kim tahlil qiladi?
— Murabbiyim, qarindoshlarim, ayniqsa, birga o‘ynagan do‘stlarim. Shuningdek, o‘zimni o‘zim tanqid qilib turaman.
— Eng yorqin hissiyotingizni ayta olasizmi?
— Har bir klubimdagi ilk gollarim. Bolaligimda “Syuren”da urgan birinchi golimni eslayman. Butun yil davomida gol urolmagandim. Mavsum oxirida Il-de-Frans musobaqalari o‘tkazildi. Burchakdan oshirib berilgan to‘pga boshim bilan zarba berdim. To‘pni to‘rda ko‘rganimda, butun maydonni yugurib chiqdim, jamoadoshlarim esa ortimdan ergashdi. Birinchi golim juda zo‘r bo‘lgandi.
— Eng yaxshi fazilatlaringiz qaysilar?
— Bu haqda gapirish men uchun emas ... Bunday qila olmayman.
— Kamchiliklaringiz-chi?
— Bunaqasi bor. Ishontirib aytamanki, o‘zim haqida gapirishim qiyin. Aytaylik, o‘zim yoki yaqinlarim haqida gapira olmayotganim aybimdir, buning yaxshi yoki yomon sifat ekanligini o‘zingiz hal qiling.
Ilk bor
Ilk bor to‘pga teginishUyim oldida akam va uning do‘stlari bilan futbol uchrashuvi bo‘lib o‘tgandi. Men o‘shanda bog‘cha yoshida edim, 4 yoki 5.
Ilk klub
“Syuren”. 5-sinfdaligimda o‘qituvchi maslahati bilan 10 yoshimda ushbu klubga qo‘shilgandim. Biz basketbol va regbi musobaqalarida qatnashardik, men yaxshi o‘ynardim va u oilamga mening ushbu sport turi bilan shug‘ullanishimni maslahat bergan. Regbi va futbol o‘rtasida tanlov qilishim kerak edi. Men futbolni tanladim.
Ilk xotira
To‘liq futbol kiyimida, ya’ni, butsi, getri va maxsus libosda maydonga tushgan o‘yinim. Haqiqiy uchrashuvlarda bizga boshqa shahar jamoasi raqiblik qilgan. Ammo biz birinchi navbatda zavq olish uchun o‘ynardik. Buni eslashni yaxshi ko‘raman.
Ilk pozitsiya
O‘ng qanot yarim himoyachisi. Men har doim yarim himoyachi bo‘lganman. Bu rolda o‘zimni qulay his qilaman. Men o‘yinda qatnashishni yaxshi ko‘raman: himoyada yordam berish, hujumda qatnashish, butun maydon bo‘ylab o‘ynash. Bu pozitsiya menga to‘liq mos keladi.
Izoh (0)