«Ўзим ҳақимда нима дейишни билмайман». Энг камтар футболчи Нголо Канте интервьюси

Нголо Кантедан кичик ҳақиқатлар

— Сизда энг яхши таассурот қолдирган футболчи ким?

— Бразилиялик Роналдо. Менда унинг голлари ёзилган DVD-кассетаси бор эди. YouTube ва шу каби платформалар пайдо бўлгач унинг ҳаракатлари ва техникасини кузатишни яхши кўрардим. У Марадона билан бирга мен жудаям қадрлаган футболчи.

— Голлар борасида дидлиман дея оласизми?

— Албатта! Футбол билан шуғулланишни кеч бошлаганимга қарамай, 10 ёшимда дўстларим билан кўп ўйнаганман. Биз Роналдо ёки Роналдиньонинг видеоларини томоша қилардик ва майдонда улар қилган ҳаракатларни такрорламоқчи бўлардик. Томошабин сифатида чиройли ўйин намойиш этадиган футболчиларни биз яхши кўрардик. Эҳтимол, мен ҳозир бундай футболчи эмасдирман (кулади).

— Футболда сизга ёқадиган ҳаракат қайси?

— Гол билан якунланадиганлари. Бу узатма бўлиши ҳам мумкин. Аммо мен жамоага ёрдам берадиган ҳимоявий ҳаракатларни ҳам яхши кўраман. Жамоа учун фойдали бўлган ҳаракатларни севишни ўргандим.

— Кимга қарши ўйнаш сизга ёқмайди?

— Танишларим ёки дўстларим билан беллашишни ёқтирмайман.

— Лондонда («Челси»да) терма жамоадан (Франция) кимни тез-тез учратасиз?

— Курт Зума ва Оливье Жиру. Эҳтимол, биз клубдан ташқарида ҳам учрашишимиз мумкин, аммо бу камдан кам ҳолатларда учрайди, боиси биз ҳар куни машғулотларда бир-биримизни кўрамиз.

— Франция жамоасининг кийиниш хонасида қандай мусиқа янграйди?

— Ҳаммасидан озгинадан бор: америкача ёки французча реп, шунингдек, Лотин Америкаси мусиқаси. Аммо мен буни бошқармайман. Бизнинг дижейларимиз Антуан Гризманн ва Преснел Кимпембе.

— Севимли машғулотингиз нима?

— Мен оилам, дўстларим билан вақт ўтказишни яхши кўраман, сайр қиламиз, PlayStation ўйнаймиз. Уйим – севимли масканим. Мен у ерда кўп вақт ўтказаман. Яқинларим билан бирга тамадди қиламиз ва вақти-вақти билан Лондон бўйлаб айланамиз. Бу шаҳарда ўзимни яхши ҳис қиляпман.

— Фильм ёки сериал?

— Кўпроқ фильм, лекин сериалларни ҳам томоша қиламан. Муаммо шундаки, агар сериал кўришни бошласам, уни охиригача етказаман.

— Агар футболчи бўлмаганингизда…

— Бухгалтерия ҳисобини ўрганганман, шунинг учун ўқишни давом эттириб, ҳисобчи бўлардим. Бу мен хоҳлаган нарса эмас, лекин бу ўтмишим, 21 ёшимда «Булон»нинг асосий жамоасига ўтиб, ўқишни ташлаганман.

— Сизда футболга бўлган иштиёқни ким вужудга келтирган?

— Акам ва унинг дўстлари, кейин мактабдаги дўстларим ҳамда бизнинг ҳудуддагилар.

— Ўйинларингизни ким таҳлил қилади?

— Мураббийим, қариндошларим, айниқса, бирга ўйнаган дўстларим. Шунингдек, ўзимни ўзим танқид қилиб тураман.

— Энг ёрқин ҳиссиётингизни айта оласизми?

— Ҳар бир клубимдаги илк голларим. Болалигимда «Сюрен»да урган биринчи голимни эслайман. Бутун йил давомида гол уролмагандим. Мавсум охирида Ил-де-Франц мусобақалари ўтказилди. Бурчакдан ошириб берилган тўпга бошим билан зарба бердим. Тўпни тўрда кўрганимда, бутун майдонни югуриб чиқдим, жамоадошларим эса ортимдан эргашди. Биринчи голим жуда зўр бўлганди.

— Энг яхши фазилатларингиз қайсилар?

— Бу ҳақда гапириш мен учун эмас ... Бундай қила олмайман.

— Камчиликларингиз-чи?

— Бунақаси бор. Ишонтириб айтаманки, ўзим ҳақида гапиришим қийин. Айтайлик, ўзим ёки яқинларим ҳақида гапира олмаётганим айбимдир, бунинг яхши ёки ёмон сифат эканлигини ўзингиз ҳал қилинг.

Илк бор

Уйим олдида акам ва унинг дўстлари билан футбол учрашуви бўлиб ўтганди. Мен ўшанда боғча ёшида эдим, 4 ёки 5.

Илк клуб

«Сюрен». 5-синфдалигимда ўқитувчи маслаҳати билан 10 ёшимда ушбу клубга қўшилгандим. Биз баскетбол ва регби мусобақаларида қатнашардик, мен яхши ўйнардим ва у оиламга менинг ушбу спорт тури билан шуғулланишимни маслаҳат берган. Регби ва футбол ўртасида танлов қилишим керак эди. Мен футболни танладим.

Илк хотира

Тўлиқ футбол кийимида, яъни, буци, гетри ва махсус либосда майдонга тушган ўйиним. Ҳақиқий учрашувларда бизга бошқа шаҳар жамоаси рақиблик қилган. Аммо биз биринчи навбатда завқ олиш учун ўйнардик. Буни эслашни яхши кўраман.

Илк позиция

Ўнг қанот ярим ҳимоячиси. Мен ҳар доим ярим ҳимоячи бўлганман. Бу ролда ўзимни қулай ҳис қиламан. Мен ўйинда қатнашишни яхши кўраман: ҳимояда ёрдам бериш, ҳужумда қатнашиш, бутун майдон бўйлаб ўйнаш. Бу позиция менга тўлиқ мос келади.

Манба