Ижтимоий тармоқларда Журъат Таджиевнинг «Хоразм ҳудудий электр тармоқлари» АЖ директори Муратбай Базаримбетовга нисбатан қўзғатилган жиноят иши бўйича видеомурожаати тарқалди. Видео юзасидан Бош прокуратура муносабат билдирди.
Таъкидланишича, 2020 йил 24 декабрь куни Ўзбекистон Бош прокуратураси ҳузуридаги ИЖҚК департаменти вилояти бошқармаси томонидан Хоразм вилоят «Ҳудудий электр тармоқлари» АЖ бош директори Базаримбетов Муратбай Алламбергенович ва бошқаларга нисбатан Жиноят кодексининг 210-моддаси 3-қисми «а» банди (жуда кўп миқдорда пора олиш) билан жиноят иши қўзғатилган.
Мазкур жиноят ишини қўзғатилишига, «Ҳудудий электр тармоқлари» АЖ бош директори М.Базаримбетов Тупроққалъа тумани ҳудудида янгидан ташкил қилинаётган «Бест Азиа Метан» МЧЖга ўрнатиладиган 630 киловаттлик трансформатор пунктини 6–10 киловаттлик электр линиясига яқин таянчдан 6500 киловаттга улаб беришда амалий ёрдам бериши эвазига 15 000 АҚШ долларини ўз хизмат хонасида тамагирлик йўли билан пора тариқасида олганлиги асос бўлган.
Ҳозирда ушбу жиноят ишининг дастлабки тергов ҳаракатлари Хоразм вилоят прокуратураси уюшган жиноятчилик ва коррупцияга қарши курашиш бўлими томонидан олиб борилмоқда.
Жиноят иши бўйича, М.Базаримбетовга нисбатан 2020 йил 25 декабрда Жиноят кодексининг 210-моддаси 3-қисми «а» банди (жуда кўп миқдорда пора олиш) билан айблов эълон қилинган. Шунингдек, Жиноят ишлари бўйича Урганч шаҳар судининг 2020 йил 25 декабрдаги ажримига асосан М.Базаримбетовга нисбатан қамоққа олиш тарзидаги эҳтиёт чораси қўлланилган.
Шу сабабли М.Базаримбетов ҳозирда Хоразм вилоят ИИБ 11-сонли тергов ҳибсхонасида сақланмоқда.
Эслатиб ўтамиз, Муратбай Базаримбетов 15 минг АҚШ доллари билан қўлга олингани 8 январь куни маълум бўлган эди.
Аввалроқ Андижонда саноат зонасидан ер олиб беришни ваъда қилиб, пора олган собиқ кадастр ходими, Бухорода ер ажратиш эвазига фуқародан 2 минг доллар пора олган ҳокимлик масъули ҳамда Самарқандда айбини яшириш эвазига ИИБ ходимига 100 доллар пора берган фуқаро қўлга олингани ҳақида хабар берилганди.
Изоҳ (0)