AQShning saylangan prezidenti Jo Bayden 20-yanvar kuni ish boshlaganidan bir necha soat o‘tgach Donald Tramp administratsiyasi tomonidan yetkazilgan “eng yomon zararni” qaytarish to‘g‘risida bir nechta farmon, memorandum va ko‘rsatmalarni imzolaydi. Bu haqda Bayden jamoasining bayonotiga tayanib Meduza xabar qildi.

Foto: EPA

Bayden, boshqa narsalar qatori, Qo‘shma Shtatlarni Jahon sog‘liqni saqlash tashkiloti (JSST) tarkibidan chiqarish to‘g‘risidagi qarorni bekor qilishni rejalashtirmoqda. Bayonotda aytilishicha, JSST “COVID-19 ga qarshi kurash bo‘yicha xalqaro tadbirlarni muvofiqlashtirish uchun juda muhimdir”.

“Qo‘shma Shtatlar JSST bilan aloqalarni tiklaganidan so‘ng Bayden–Xarris ma’muriyati JSST va hamkorlarimiz bilan tashkilotni mustahkamlash va isloh qilish ustida ishlaydi”, – deyiladi bayonotda.

Bundan tashqari, Bayden AQSh–Meksika chegarasida devor qurilishini to‘xtatib, bir qancha musulmon davlatlari fuqarolari uchun kirish cheklovlarini olib tashlamoqchi.

Bayden allaqachon davlat rahbari sifatida bir nechta tashabbuslarni ilgari surgan. U pandemiyada iqtisodiyotni rag‘batlantirish uchun deyarli ikki trillion dollarlik rejani taqdim etdi. Uning taklif qilgan chora-tadbirlari orasida AQSh fuqarolariga 2020-yil dekabrida Kongress tomonidan tasdiqlangan 600 AQSh dollaridan tashqari, 1400 dollardan qo‘shimcha to‘lov ham bor.

Ma’lumot uchun, Jo Bayden 2020-yil noyabr oyida bo‘lib o‘tgan AQSh prezidentlik saylovlarida g‘olib chiqdi. U AQSh Demokratik partiyasining vakili hisoblanadi.

Avvalroq Vashingtonga inauguratsiya chog‘ida tartibni ta’minlash uchun 25 ming nafar Milliy gvardiya harbiylari yetib kelgani, Donald Tramp xayrlashuv nutqini e’lon qilgani hamda Tramp Baydenning inauguratsiyasidan bir kun avval koronavirus tufayli AQShga kirishga qo‘yilgan taqiqni bekor qilgani haqida xabar berilgan edi.