Shavkat Mirziyoyev raisligida qarorlarni ijrosini ta’minlashga bag‘ishlangan yig‘ilish o‘tkazildi. Unda qaror va topshiriqlarning quyi bo‘g‘ingacha tushunarli tarzda yetib borishi muhokama qilindi.
“Kun tartibidagi masala – prezident qarorlarini, farmonlarini joylarda qog‘ozda emas, amalda tizimli ravishda xalqqa yetkazib borish. To‘rt yilda keng ko‘lamli islohotlarni amalga oshirish bo‘yicha 2 mingdan ziyod qaror qabul qilindi. Mana shu qarorlarni mazmun mohiyatini ayrim rahbarlar, o‘rta va quyi bo‘g‘in xodimlari to‘liq tushunmayotgani oqibatida hozirgi tahlillarda 600 dan ortiq topshiriq ijrosi yakuniga yetkazilmagan.
Misol uchun, sog‘liqni saqlash, uy-joy kommunal xizmat ko‘rsatish, oliy ta’lim, transport, suv xo‘jaligi va davlat mulkini boshqarish sohalari bo‘yicha vazirlarni, vazir o‘rinbosarlari, davlat mulkini boshqarish rahbarlarini o‘zgartirishga majbur bo‘ldim. Nimaga? Salohiyati yetmagandan.
Qarorlarni eng quyi ijrosigacha o‘z vaqtida va tushunarli tilda yetkazib borishni ta’minlaydigan yangi tizim amalga oshirishimiz kerak. Prezident hujjatlari eng quyi bo‘g‘in mas’ullarga yetkazadigan mazmunini tushuntiradigan, ularni qo‘llashga ko‘maklashadigan amaliyotni yo‘lga qo‘yishimiz kerak.
Endi har bitta qarorni viloyat hokimi qo‘l qo‘yishdan oldin qanday, necha kunda, qanday sohalar bo‘yicha, kim borib buni o‘rgatadi shularni o‘rgatish kerak. O‘rgatmasdan quyi pog‘onaga tushirish man etiladi.
Quyi bo‘g‘in xodimlarini sohaga oid qabul qilingan har bir yangi qaror bo‘yicha o‘qitiladi. Agar biz shuni o‘qitmasak, o‘rgatmasak, 2 mingtadan 600 ta bajarilmagan qarorlar juda meni xavotirga solyapti.
Murojaatnomamda aytilgan televideniye, radio, ro‘znomalarda “Prezident qarorlari hayotda va nazoratda” rubrikasini oddiy tilda yo‘lga qo‘yish kerak. Bu qaror odamlarga nima manfaat olib keladi. Odamlarni qiynayotgan masala aslida — mana shu.
Quyi pog‘onadagi rahbarlarda dunyoqarash o‘zgarishi kerak, mas’uliyat o‘zgarishi kerak. Ana shunda natija bo‘ladi.
Bizga 2021-yil bu sohada izlanish va o‘rganish bo‘ladi”, – dedi Shavkat Mirziyoyev.
Avvalroq O‘zbekistonda 4 bosqichli ijro tizimi tashkil etilishi haqida xabar berildi. Bular – ijroni loyiha bosqichida rejalashtirish, ijroni tashkil etish va ko‘maklashish, ijroni baholash, ijroni nazorat qilish.
Izoh (0)