“Qonun yo‘li bilan to‘xtatishga urinsak, inson huquqlari masalasi o‘rtaga chiqadi” – Shavkat Mirziyoyev oilaviy ajrimlar haqida

Prezident Shavkat Mirziyoyev 15-yanvar kuni Yunusobod tumani faollari bilan uchrashuvda mahalla vakillari va bir guruh yoshlarning taklif hamda fikr-mulohazalarini eshitdi.

“Daryo” muxbiri Mirolim Isajonovning xabar berishicha, tadbirda Yunusobod tumanidagi mahalla faollaridan biri o‘z hududida yosh oilalar o‘rtasida ajrimlar ko‘payib borayotgani, bu kabi holatlarning oldini olish va kamaytirish maqsadida turmushning dastlabki yillarida ajrashishni qonun yo‘li bilan taqiqlash lozimligini aytgan.

“To‘g‘risini aytsam, bizning hududda yosh oilalar o‘rtasida ajralishlar ko‘p kuzatilmoqda. Bu kabi holatlarning oldini olish va kamaytirish maqsadida shunday tartibni o‘ylab ko‘rishimiz kerakki, yoshlar oila qurganidan so‘ng ular orasida uch, to‘rt yilgacha umuman ajrashish holati kuzatilmasin. Aksariyat ajrimlar to‘yiga bir yil ham to‘lmagan oilalar o‘rtasida bo‘lyapti. Biz ularni yashab ketishiga majbur qilolmaymiz. Yoshlarni yarashtirib, muddat beramiz, yana yarashtirib, muddat beramiz... Ohiri oilaga darz ketmoqda. Shuning uchun yosh oilalar ajrimiga qonuniy tomondan qandaydir chegaralar qo‘yilsa, degandim”, — dedi mahalla faoli.

Davlat rahbari mazkur taklifga munosabat bildirarkan, bugungi yoshlarning ko‘pi hayotga juda yengil qarayotganini ta’kidladi.

“Siz ko‘targan masala juda dolzarb. Oilaviy ajrimlarning ko‘pligi bizning urf-odatimizga umuman yarashmaydigan holat. Albatta, sizni to‘g‘ri tushunyapman, farzandlarimiz kelajagini o‘ylab shu taklifni aytyapsiz. Ammo ajrimlarni qonun yo‘li bilan to‘xtatishga urinsak, ya’ni ajrimlarga qarshi kurashish maqsadida yosh oilalar uch yil ichida ajrashmasin, deb qonun chiqarsak, inson huquqlari masalasi o‘rtaga chiqadi. Bilasizmi, eng katta masala shuki, qo‘polroq bo‘lsa ham aytaman, madaniyatimiz yetishmayapti, to‘qlikka sho‘xlik qilyapmiz, shukronalik yo‘q. Agar odamlarda shukronalik bo‘lsa, ular hech qachon ajrashmaydi. Hozirgi yoshlarning ko‘pi hayotga juda yengil qarayapti. Ajrimlarning oldini olish yo‘lida mahalla faollarining ham fikrlarini inobatga olish kerak. Bundan tashqari, bu borada bir qancha tizimli dasturlarni ham, albatta, ishlab chiqamiz”, — dedi Shavkat Mirziyoyev.