Namanganda xalq deputatlari viloyat kengashining o‘n oltinchi sessiyasi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Sessiyada joriy yil 10-yanvar kuni xalq deputatlari viloyat kengashi deputatligiga o‘rni bo‘shab qolgan 6-Serob va 33-Navoiy saylov okruglarida o‘tkazilgan saylov yakunlari va saylangan deputatlarning vakolatlarini e’tirof etish haqidagi masala ham ko‘rib chiqildi.
Viloyat saylov komissiyasining joriy yil 12-yanvardagi qarori bilan 6-Serob saylov okrugidan viloyat hokimi Shavkat Abdurazzoqov va 33-Navoiy saylov okrugidan “Doktor-A” MChJ ta’sischisi Yoqub Ahmedovning viloyat kengashi deputatlari etib saylangani ma’lum qilindi.
Saylov komissiyasi ma’lumotlariga ko‘ra, Shavkat Abdurazzoqov saylovda ishtirok etganlarning 83,3 foiz, Yoqub Ahmedov esa 56,1 foiz ovozini to‘plagan.
Sessiyada ularga deputatlik guvohnomasi va ko‘krak nishonlari topshirildi.
Ma’lumot uchun, xalq deputatlari Namangan viloyat kengashiga 6-Serob okrugidagi o‘rin sobiq viloyat hokimi Xayrullo Bozorovning deputatlik vakolatini muddatidan avval soqit qilishni so‘rab yozgan arizasiga ko‘ra, 33-Navoiy saylov okrugidagi o‘rin esa deputat Islom Tayrbayevning vafot etganligi munosabati bilan bo‘shab qolgan edi.
Izoh (0)