Банкка кредит сўраб борилганда «ресурс йўқ» деган жавоб берилиши асослими? Марказий банкнинг Қашқадарёдаги масъули жавоб берди

Тижорат банкларига кредит сўраб борилганда банк раҳбарияти томонидан кўпинча «ресурс йўқ» деган жавоб берилади. Мазкур жавоб банк ходимининг вазиятдан чиқишга уриниши бўлиши ҳам мумкин. Бу ҳақда Қарши шаҳридаги Журналистлар уйида бўлиб ўтган матбуот анжуманида маълум қилинди, дея хабар берди «Дарё» мухбири.

Қарши шаҳридаги Журналистлар уйида 8 январь куни Марказий банкнинг вилоят бошқармаси масъуллари ва 16 та тижорат банкининг бошқарув раислари иштирокида матбуот анжумани ташкил этилди.

Унда сўз олган Марказий банкнинг вилоят бош бошқармаси бошлиғи Файзулла Ражабов «Дарё» мухбирининг «Фуқаролар банкдан кредит сўраб борганда банк раҳбарияти томонидан ‘ресурс йўқ’ деган жавоб берилиши, мазкур савол катта раҳбарлар иштирокидаги сайёр қабулларда такрорланганда эса банк раҳбарияти ‘ресурс йўқ’ деган жавобни айтолмаслигининг сабаби нимада? Ўзи банк раҳбариятининг фуқаро мурожаатига жавобан банкда ‘ресурс йўқ’ деб жавоб бериши қай даражада асосли?», деган саволига «Мазкур жавоб тажрибасиз ходимнинг вазиятдан чиқишга уриниши бўлиши ҳам мумкин», дея жавоб берди.

«Тан олиш керак, мазкур масала жойлардаги энг кўп муҳокамаларга сабаб бўлаётган ҳолат. Баъзан жойлардаги банк ходимининг шу гап орқали вазиятдан чиқишга уринишини оқлаб бўлмайди. Ўша банк ходимининг фикрлашича, фуқаронинг муаммосига ечим — шу. Аслида тижорат банкининг бош мақсади даромад олишдан иборат. Яъни банк омонат жалб қилиб, устига ўз фоизини қўйиб, таваккалчиликка асосланган кредитлаш билан шуғулланади. Айтмоқчи бўлганим, агар банкда ресурс бўладиган бўлса, пулни ушлаб туришдан банк манфаатдор эмас», — деди Файзулла Ражабов.

Марказий банкнинг вилоятдаги масъули жавобига кўра, банк ходимларининг кредит сўраб борган фуқарога ‘ресурс йўқ’ дейиши банкнинг иқтисодий имкониятига боғлиқ бўлиши мумкин.

Файзулла Ражабовнинг маълумот беришича, 2020 йил Қашқадарёда банк мижозларига 364 миллиард сўм кредит берилиши режалаштирилган бўлса-да, вилоят банклари мазкур йилда аҳолига 481 миллиард сўм кредит берган.

«Энди савол туғилади, режа 361 миллиард сўм бўлган бўлса, банклар 481 миллиард сўм кредит берган. Хўш, қолган маблағ қаердан олинган, дейишингиз мумкин. Бизга Молия вазирлиги томонидан 2018 йилдан бошлаб дастурларни молиялаштириш учун керакли маблағ бериб келинмоқда. Ана ўша 2018 йилда аҳолига берилган кредит маблағларининг асосий қисми бугунги кунга келиб қайта бошлади. Биз айнан шу қайтган маблағлар ҳисобидан аҳолига кўпроқ кредит бердик», — дейди Марказий банкнинг вилоят бош бошқармаси бошлиғи.

Файзулла Ражабовнинг қўшимча маълумот беришича, вилоятда аҳолига берилган ижтимоий кредитларнинг бугунги кунга келиб 18 миллиард сўми қайтмаган бўлса, тижорат кредитларидан қайтмаган маблағ 300 миллиард сўмдан ошиқроқни ташкил қилади.

«Аҳолига берилган кредитларнинг ўз вақтида қайтмаслиги ресурс тақчиллигига олиб келувчи асосий сабаб ҳисобланади», — дейди Файзулла Ражабов.