«Тошшаҳартрансхизмат» пойтахтнинг 8-сонли автобус йўналишини ёпиш ва 131-сонли автобус йўналишини қисқартириш тўғрисидаги қарорни қайта кўриб чиқди. Компания матбуот хизматининг хабар беришича, ушбу йўналишларни ёпмаслик, ҳаракатини қисқартирмасликка қарор қилинди.
11 январдан бошлаб Сергели 7-даҳасидан Чилонзор 25-даҳага қатновчи 8-сонли автобус йўналишини ёпиш, «Дўстлик 2-мавзеси—Олимпия мавзеси» автобус йўналишини «Дўстлик 2-мавзеси»дан «Жанубий вокзал» автошоҳбекатигача қисқартириш режалаштирилганди. Ушбу таклиф йўловчиларда норозилик уйғотди.
«Йўловчилар томонидан билдирилган мурожаатларни инобатга олган ҳолда ҳамда ушбу йўналишнинг фаолиятини янада чуқур ўрганиб чиқиш муносабати билан, шунингдек, йўловчилар ташишдаги узилишларнинг олдини олиш мақсадида 131-сонли йўналиш ҳаракати вақтинчалик ўзгартиришсиз қолдирилишини маълум қиламиз» — дейилади «Тошшаҳартрансхизмат» хабарида. Шунингдек, 8-сонли йўналиш ҳаракати ҳам вақтинчалик ўзгартиришсиз қолдирилиши билдирилган.
Эслатиб ўтамиз, Тошкент шаҳридаги автобус йўналишлари тармоғини мақбуллаштириш Вазирлар Маҳкамасининг 2020 йил 16 мартдаги «Тошкент шаҳар йўловчи транспорти тизимини такомиллаштириш чора-тадбирлари тўғрисида»ги қарорига асосан амалга оширилмоқда.
Унинг Сергели метроси ишга туширилиши билан боғлиқ навбатдаги босқичи доирасида 11 январдан бошлаб 8 ва 132-сонли йўналишлар ёпилади. 132, 80 ва 133-сонли йўналишлар ҳаракатланиш трассалари ўзгартирилади, 38-йўналиш ҳаракати узайтирилади.
Автобус йўналишларини мақбуллаштириш бўйича ҳамма таклифлар ҳам йўловчилар томонидан ижобий қабул қилинмаган.
Аввалроқ Тошкентдаги икки автобус саройини вилоятга кўчириш режалаштирилаётгани тўғрисида хабар берилганди.
Изоҳ (0)