Ўзбекистонда 11 январдан барча мактабларда ўқув жараёнлари тўлиқ анъанавий шаклга ўтказилиши хабар берилганди. Бу хабар ижтимоий тармоқларда кўплаб тушунмовчилик ва эътирозларга сабаб бўлгани учун Халқ таълими вазирлиги ота-оналарнинг фикрини инобатга олган ҳолда айрим ўқувчилар учун онлайн таълим давом этишини маълум қилди.
Қайд этилишича, Ўзбекистонда мактаблар 2020 йил сентябрь ойидан санитар-эпидемиологик талабларга жавоб берган ҳолда босқичма-босқич фаолиятини тиклаганди. Қишки таътилдан аввал республика ўқувчиларининг 90 фоизи анъанавий таълимга қайтди. Қолган 10 фоиз ўқувчиларнинг ҳам келажагига бефарқ бўлмай, уларни ҳам мактаб таълимига бевосита қамраб олиш мақсад қилинган эди.
Вазирлик хавотирга ўрин йўқ эканлигини, уйида касаллик тарқалишига хавотир катта бўлган, кекса одамлари бор ҳамда саломатлигида сурункали хасталиги бўлган ўқувчиларнинг таълим олиши учун параллел равишда «Онлайн-мактаб» лойиҳаси ҳам давом эттирилишини маълум қилди. Бундай оилалар аввалги чоракдагидек ўқишини уйидан давом эттиришига имконият яратилади.
«Ўқувчилар ўртасида ўтказилган сўровномаларда уларга карантин даврида ўқитувчилари ва тенгдошлари билан ўзаро бевосита мулоқот етишмагани аниқланди. Мактабга бормаётган ўқувчилар эса, афсуски, ана шундай имкониятдан маҳрум бўлиб қолмоқда, бола учун дўстлари билан доимий мулоқотда бўлиш ва улар билан бир жамоа бўлиб таълим олиш жуда муҳим, ҳеч қандай энг замонавий технология айнан шу муҳитни бола учун таъминлаб бера олмайди.
Шу ўринда фарзандини мактабга юбормайдиган ота-оналардан, уларнинг вақтини бесамар ўтказмасликлари ҳамда уйда таълим олишлари учун барча зарур шарт-шароитларни яратиб, уларни тўлиқ назоратга олишларини сўраб қоламиз», — дейилади ХТВ хабарида.
Аввалроқ мактабларда вақтинча ўтилмаётган фанлар 3-чоракдан давом этиши ҳақида хабар берилганди.
Изоҳ (0)