“Muhtasham yuz yil” 10 yoshda: Olamshumul muvaffaqiyat qozongan serial haqida qiziqarli faktlar (foto)

“Muhtasham yuz yil” seriali suratga olinganiga 10 yil to‘ldi. Dunyo bo‘ylab ushbu serialning millionlab tomoshabinlari Sulton Sulaymon va Xurramning sevgi hikoyasini kuzatdi. Telekanallar serial reytingidan hayratga ham tushdi. Turkiyadagi eng muvaffaqiyatli serial aslida qanday paydo bo‘lgan va voqealar tugallangan bo‘lsa-da, nega serialni qaytadan tomosha qilish kerak degan savollarga quyida javob topish mumkin.

Avval orzu bo‘lgan

Prodyuser Temur Savji Buyuk Usmonli imperiyasi, Sulton Sulaymon hamda uning sevimli rafiqasi Xurramning ajoyib muhabbat qissasi haqida turkum yaratish haqida o‘ylay turib, “Bunday loyihani amalga oshirish mumkin emas, bu juda mas’uliyatli va murakkab ish”, − deya xavotirga tushgan.

Ungacha Turkiyada bu kabi serial suratga olinmagan. Loyihaning ko‘lami juda keng bo‘lib, unda XVI asr manzaralari, janglar hamda juda mashaqqatli kasting zarur edi. Prodyuserning ushbu g‘oyasini faqat ssenariy muallifi Meral Akay qo‘llab-quvvatladi. U Savjini uddalashiga ishontirdi. Shuningdek, iste’dodli rejissor Durul va Yagmur Taylanlar hamkorligida ish boshlanib, loyiha uchun mablag‘ sarflandi.

Sulaymonning raqobatchilari bo‘lmagan

Akay va Savjining aytishicha, tayyorgarlik bosqichida ham Usmonli imperiyasining o‘ninchi sultoni rolida faqat Xalit Ergenchni ko‘rgan. Ushbu aktyordan boshqa hech kim tasavvur ham qilinmagan. Aktyor bilan aloqaga chiqilganda, u ikkilanmasdan rozi bo‘lgan. Keyinchalik Ergench bu uning hayotidagi eng muhim rol bo‘lib qolishini anglagan.

Keyingi bir yarim yil mobaynida dekoratsiyalar qurilayotgan vaqt hamda kasting jarayonlari davom etayotganida Ergench ulov minishni o‘rgandi, kurash bo‘yicha mashg‘ulotlarga qatnashdi va Usmonli imperiyasi tarixi haqida ko‘plab kitoblar mutolaa qildi. Bularning barchasi suratga olish maydonchasida foyda berdi.

Xurram roli uchun aktrisa Rossiya va Ruminiyadan qidirilgan

Xurram sultonsiz “Muhtasham yuz yil”ni tasavvur qilib bo‘lmaydi. Oddiy kanizakdan tarixdagi eng qudratli ayollardan biriga aylandi. Biroq ushbu rolga darhol tasdiqlangan Xalit Ergenchdan farqli o‘laroq, uning rafiqasi Xurram 6 oydan ko‘proq vaqt davomida izlangan.

Ijodiy guruh aktrisani butun Turkiya, Rossiya, Ruminiya va boshqa mamlakatlardan ham izlagan. Ammo natija bo‘lmagan. Filmni suratga olish ishlari boshlanishiga bir haftadan oshiq vaqt qolganida, Temur Savji Germaniyada ular izlagan ijrochi borligini aniqlagan: qizil soch, go‘zal hamda slavyan ko‘rinishga ega. U nemis-turk aktrisasi Maryam Uzerli edi. Qisqa muddat ichida Savji ushbu rolni Xurramdan boshqa hech kim yaxshi o‘ynay olmasligini anglab yetgan.

Dekoratsiya − vaqt mashinasida sayohat qilish

Serialni haqiqiy sultonlar kanizaklari bilan yashagan mashhur To‘pqopi saroyida suratga olish imkonsiz edi. Buning uchun maydoni 5 ming kvadrat metr bo‘lgan qadimiy Istanbulning shahar manzarasi, bozori va ko‘chalari qurildi.

Dekoratsiya shu qadar haqiqiy bo‘lganki, aksariyat aktyorlarning fikriga ko‘ra, ular chindan ham o‘zlarini o‘sha davrdagidek his qilgan.

Muzokaraga sabab bo‘lgan liboslar

Serial ekranlarda namoyish etilganidan so‘ng tanqidchilar va tomoshabinlar tomonidan liboslarga munosabatlar bildirilgan. Sababi sultonlar va kanizaklar haddan tashqari ochiq kiyingan edi. Bu o‘sha davrdagi urf-odatlarga, umuman, islom qonunlariga zid edi. O‘sha davrda hech qaysi ayolda tor va ko‘ksi ochiq libos bo‘lmagan.

Stol, shamdon, parda va kumushlar

Afsuski, bularning barchasi Sulaymon I davrida bo‘lmagan. Sulton va uning a’yonlari past o‘rindiq va yostiqlardan foydalangan. Idishlar toshbaqa qobig‘ida berilib, ovqatlar qo‘l bilan iste’mol qilingan va og‘iz dasturxon qirrasiga artilgan.

Serialda esa qahramonlar stol atrofida to‘planib, sham yorug‘ida suhbat quradi. Shuningdek, pichoq, sanchqi va qog‘oz salfetkalardan foydalangan.

Xurramning to‘qima raqiblari

Xurramning raqiblariga nisbatan rashkdan yonish sahnalari mavjud. Serialda Kastiliya malikasi Izabella mavjud bo‘lsa-da, u tarixda Sulton Sulaymon taxtga o‘tirmasidan avval vafot etgan. Feruza xotun esa tarixda mavjud bo‘lmagan obraz bo‘lib, forslar yuborgan josus to‘qima obraz sifatida namoyon bo‘lgan.

Kamchiliklar − ularsiz serialning qizig‘i bo‘lmaydi

Serialda Sulaymonning harbiy yurishlari bilan bog‘liq sahnalarga alohida e’tibor berilgan. Sababi u birinchi navbatda iste’dodli sarkarda sifatida tan olingan.

Har bir epizod alohida e’tiborga olinsa-da, muharrir ko‘zdan qoldirgan joylar ham topiladi. Ulardan biri Bali Bey (Burak O‘zchivit) ortida ko‘rinib qolgan traktor.

O‘g‘il onaga qaraganda kattaroq

Serialda deyarli barcha aktyorlar o‘z qahramonidan kattaroq edi. Biroq Mohidavron sulton (Nur Fettaho‘g‘li) va shahzoda Mustafo (Mehmet Gunsur) misolida hammasi o‘zgacha bo‘ldi. Hayotda farzand rolini ijro etgan Gunsur onasidan 5 yoshga katta.

Bu o‘rinda vizajistlar muvaffaqiyatli ish olib bordi va onaning yoshini ulg‘aytirib, o‘g‘ilni yanada yoshartirdi. Shunisi qiziqki, Mehmet Xalitdan unchalik ham kichik emas, ota va o‘g‘il orasidagi farq ham atigi 5 yil.

“Muhtasham yuz yil”dan keyin aktyorlarning faoliayti qanday kechdi?

Ko‘plab kamchiliklarga qaramay tomoshabinlar “Muhtasham yuz yil” qahramonlarini yaxshi ko‘rib qoldi. Ular hanuzgacha bahsli sahnalarni muhokama qiladi, taassurotlar bilan o‘rtoqlashadi va aktyorlar hayotini kuzatadi. Aktyorlar esa loyiha yakunlangach, muvaffaqiyatli martabaga ega bo‘ldi. Aksariyati yangi film va seriallarda yana bosh qahramon sifatida rol ijro etgan bo‘lsa, yana ba’zilari ma’lum sabablarga ko‘ra karyerasini tark etib, o‘zini butunlay oilasiga bag‘ishladi.