Amerikalik aktrisa va model Tanya Roberts 5-yanvar tongida Los-Anjelesdagi shifoxonada vafot etdi. Bu haqda aktrisani davolagan shifokorga tayanib, TMZ xabar berdi.
TMZ va boshqa OAVlar xatolik sabab Robertsning agenti Maykl Pingelga tayanib, uning o‘lganini 4-yanvar kuni yozgandi. Biroq oradan bir necha soat o‘tgach, Pingel ushbu ma’lumotni rad etgan. U sodir bo‘lgan voqeani aktrisaning do‘sti, O’Brayen bilan “tushunmovchilik” deb izohlagan.
O’Brayenning Page Six nashriga ma’lum qilishicha, u Pingelga Roberts yotgan kasalxonaga tashrif buyurgani va “Tanya bilan vidolashib, uning ajoyib ko‘zlarini so‘nggi bor ko‘rganini” aytgan. Pingel esa bu so‘zlarni Robertsning o‘limi sifatida qabul qilgan. O’Brayenning qo‘shimcha qilishicha, u ham Robertsni o‘lgan deb o‘ylab, kasalxonadan shifokorlar bilan gaplashmay chiqib ketgan. Aktrisaning o‘limi haqidagi xabarlar OAVda tarqalgach, tibbiyot xodimlari u bilan bog‘lanib, Tanyaning tirikligini aytgan.
65 yoshli Tanya Roberts 24-dekabr kuni shifoxonaga yotqizilgan edi. O’Brayenning so‘zlariga ko‘ra, unga siydik yo‘li infeksiyasi tashxisi qo‘yilgan. U og‘ir ahvolda bo‘lgani aytilmoqda.
Tanya Roberts 1985-yilda ekranlarga chiqqan “A view to a kill” (Jeyms Bond haqidagi) filmida suratga tushgan. Shuningdek, u “Barmoqlar” (1978-yil), “Shina — jungli qirolichasi” (1984-yil) filmlari, “70-yillar shousi” (1998—2006) serialidagi rollari bilan mashhurlikka erishgan edi.
Eslatib o‘tamiz, 2020-yilning oktabrida Jeyms Bond roli bilan mashhurlikka erishgan Shon Konneri 90 yoshida vafot etgandi.
Izoh (0)