“Matritsa-4”, “Qora beva”: 2021-yilning eng ko‘p kutilayotgan filmlari (foto)

2020-yil boshqa sohalar singari kinosanoat uchun ham oson bo‘lmadi. Shunga qaramay, mahoratli rejissorlar va suratga olish jamoalari kutishga arzigulik filmlarni suratga olishga muvaffaq bo‘ldi.

“Ko‘chmanchilar yeri”

Rejissor Xloya Chjao tomonidan suratga olingan mazkur film Venetsiya kinofestivalining eng oliy mukofotiga loyiq deb topilgan. Kartinada Frensis MakDormand ish qidirib, Amerika bo‘ylab darbadar yurgan qahramon rolini ijro qilgan.

“Ghostbusters: Afterlife”

Jeyson Raytman rejissorligida suratga olingan mazkur film sujetiga ko‘ra, meros qolgan kichik bir xaroba uyga oilaning ko‘chib kelishi g‘ayritabiiy kuchlarning noodatiy faolligiga to‘g‘ri keladi va bu atrofdagilar hayotini tubdan o‘zgartirib yuboradi. Arvoh ovlovchilarning yangi avlodlari qanday qilib bo‘lsa ham sirli merosning qolishi bilan bog‘liq ma’lumotga ega bo‘lishi va kelib chiqishi mumkin bo‘lgan oqibatlarning oldini olishiga to‘g‘ri keladi.

“Nyuarkning ko‘plab avliyolari”

Alan Teylor tomonidan suratga olingan kriminal drama 1960-yillardagi Nyuark hayoti haqida hikoya qiladi. Sujetga ko‘ra, shaharda afroamerikaliklar sonining keskin ortishi italyanlarning noroziligiga sabab bo‘ladi va buning oqibatida qurolli to‘qnashuvlar yuzaga keladi.

“Raya va so‘nggi ajdar”

Disney multfilmi sujetiga ko‘ra qachonlardir Kumandra nomli fantastik olamda odamlar va va ajdarlar ahil va inoq hayot kechiradi. Ammo ayrim maxluqlar shahar hayotiga xavf solganidan keyin ajdarlar odamlar hayotini saqlash uchun o‘zini qurbon qiladi. Oradan 500 yil o‘tib, maxluqlar yana qaytib keladi va Raya ismli yolg‘iz jangchi Drunlarni to‘xtatish uchun so‘nggi ajdarni qidirib topishi kerak bo‘ladi. Safari davomida Raya dunyoni qutqarish uchun ajdar sehrining o‘zi kamlik qilishi, bundan tashqari ishonch ham bo‘lishi kerakligini anglab yetadi.

“007: O‘lish vaqti emas”

Keri Fukunaganing mazkur filmi sujetiga ko‘ra, maxfiy xizmatni tark etib, Yamaykada tinch va betashvish hayot kechirayotgan Jeyms Bondning oldiga eski do‘sti Feliks Leyter keladi va undan yo‘qolgan olimni topishga ko‘maklashishini so‘raydi. Qutqaruv operatsiyasi kutilgandan ham xavfliroq bo‘lishi va Bondning bunga qarshi kurashishi voqealar rivojini tashkil qiladi. Xans Simmer kompozitorlik qilgan mazkur filmga yosh va iste’dodli xonanda Billi Aylish saundtrek ijro qiladi.

“Sokin joy-2”

Jon Krasinskining ushbu filmi voqealari koinotdan kelgan kelgindilarning yerdagi odamlarni ovozi orqali ovlashi bilan bog‘liq. Qutilib qolgan odamlar normal hayot kechirishi mumkin, faqat xavfsizliklari uchun asosiy qoidaga amal qilishi, biron ovoz va tovush chiqarmasligi kerak bo‘ladi.

“Qora beva”

Keyt Shortlandning mazkur filmida Skarlett Yoxansson ijrosidagi qahramon Natasha Romanoff “Amerika: Fuqarolar urushi” filmidagi voqealardan keyin qasoskorlar jamoasiga kelib qo‘shilguniga qadar yuz bergan o‘tmishi bilan bog‘liq voqealarni yengib o‘tishiga to‘g‘ri keladi.

“Dyuna”

XX asrning eng mashhur ilmiy-fantastik romanining ekranizatsiyasi bilan rejissor Deni Vilnev shug‘ullangan. 1984-yilda Devid Linch ham filmning birinchi versiyasini suratga olgan va muxlislar tomonidan e’tirof etilganiga qaramay rejissorning o‘zi ushbu filmni eng omadsiz loyihalaridan biri deb biladi.

“Vestsayd hikoyasi”

Musiqa janridagi ushbu romantik drama zamonaning eng yaxshi rejissorlaridan biri Stiven Spilberg tomonidan suratga olingan. Film Uilyam Shekspirning “Romeo va Julyetta” nomli dramasi adaptatsiyasi hisoblangan, 1961-yilda suratga olingan shu nomli ijod namunasi remeyki hisoblanadi. Sujetga ko‘ra, 1950-yillar Nyu-Yorkda Toni va Mariya ismli o‘smirlar raqobatchi ko‘cha bandalari Oq Jets va Akula Puerto Riko bilan aloqasi bor ekaniga qaramay, bir-birini sevib qoladi.

“Boqiylar”

Film sujetiga ko‘ra, abadiy hayot kechiradigan superinsonlar odamlarni yovuzlardan himoya qiladi. “Boqiylar” Marvel’ning komikslari asosida suratga olingan.

“Matritsa-4”

Lana Vachovskining mazkur filmi avvalgi franshizalari singari bosh qahramonlarning Yer aholisi ustidan nazorat o‘rnatgan kompyuter dasturlariga qarshi kurashishi haqida hikoya qiladi. Kianu Rivzning ma’lum qilishicha, sevgi hikoyasi ham o‘rin olgan mazkur qism prikvel bo‘lmaydi.