АҚШ Демократик партиясидан конгрессменлар Тед Лью ва Кетлин Райс Федерал қидирув бюросидан (ФҚБ) мамлакатнинг амалдаги президенти Дональд Трампга нисбатан жиноий тергов бошлашни талаб қилди. Бу ҳақда Лью ўз Twitter’ида ёзди, деб хабар бермоқда «РБК».
«Собиқ прокурорлар сифатида биз Кетлин Рей билан шундай фикрдамизки, Дональд Трамп Жоржия штати давлат котиби Раффенспергер билан суҳбат чоғида сайловчиларнинг 11 780 та овозини топишни талаб қилганида бир нечта жиноятларни содир этган. Бугун биз ФҚБга жиноят иши очишни талаб қилиб хат юбордик», — деб ёзди конгрессмен.
Аввалроқ The Washington Post газетаси Дональд Трамп ва Жоржия давлат котиби Бред Раффенспергер ўртасидаги суҳбат аудиосини эълон қилган эди. Унда АҚШнинг амалдаги президенти амалдорни штат сайловларидаги мағлубиятини бекор қилиш учун етарлича овоз «топишга» чақирган.
Трамп суҳбат давомида Раффенспергерни уришган, «хушомад» қилган, ҳаракат қилишини «ўтиниб сўраган» ва ҳатто жиноий таъқиб қилиш билан мужмал таҳдид қилган. Президент Раффенспергер Фултон округида ноқонуний йўқ қилинган минглаб сайлов бюллетенларини топмаса (бунга бирор далил йўқ), давлат котиби ва офиснинг бош юрисконсулти Ратан Жермани жавобгарликка тортилишини тахмин қилган.
NBC ёзишича, ФҚБ директори Кристофер Рейга йўлланган хатда демократ конгрессменлар Трамп томонидан сайловларнинг қалбакилаштирилгани борасидаги далиллар аниқ-равшан эканлигини билдирган.
Изоҳ (0)