Байден Трампни президент мажбуриятларини бажаришни истамасликда айблади

АҚШнинг амалдаги президенти Дональд Трамп ўзининг давлат раҳбари сифатидаги мажбуриятларини бажаришни истамаяпти. Бу ҳақда мамлакатнинг сайланган президенти Жо Байден Жоржия штатида ўз тарафдорлари қаршисида сўзлаган нутқида айтиб ўтди, деб ёзади «РБК».

Байденнинг сўзларига кўра, Трамп маъмуриятининг ишлари бошиданоқ юришмаган. «Президент вақтини беҳуда сарфлаяпти, у муаммоларни ҳал қилиш ўрнига, куйиб-пишади ва нолийди. Тушунмайман, нима учун у ҳалиям президент лавозимига ёпишяпти, ахир у президентнинг ишини бажаришни хоҳламаяпти-ку?» — деди демократ.

Жоржияда 5 январь куни сенатга сайловларнинг иккинчи босқичи бўлиб ўтиши керак, унинг якунлари конгресс юқори палатасини ким назорат қилишини белгилайди. Агар иккала мандатни ҳам Республикачилар партиясидан номзодлар Дэвид Пердю ва Келли Леффлер қўлга киритса, республикачилар сенатда кўпчилик ўринни сақлаб қолади.

Ўз нутқида Байден Пердю ва Леффлер Жоржия аҳолисига ҳам, конституцияга ҳам эмас, амалдаги президентга содиқликка онт ичганини айтди. Шу муносабат билан у демократлардан номзодларни қўллаб-қувватлашни сўради.

Декабрь охирида Байден Американинг президент Трамп раҳбарлигидаги жорий маъмурияти янги кейинги маъмуриятга ишларни топшириш жараёнида ўзини масъулиятсиз тутаётганини айтган эди.

Аввалроқ АҚШнинг сайланган вице-президенти Камала Харрис кетаётган президент Дональд Трампни ҳокимиятни суиистеъмол қилишда айблаган эди.

«Ёзиб олинган суҳбат ҳақида ҳаммаларингиз эшитгандирсиз? Бу, албатта, умидсизликка тўла овоз эди… Бу АҚШ президенти томонидан ҳокимиятнинг очиқчасига ва қўпол равишда суиистеъмол қилиниши эди», — деди Харрис Жоржия штатининг Савана шаҳрида демократ сенаторларга овоз бериш бўйича ташвиқот қилиб нутқида.

Гап, гўёки, Трампнинг Жоржия штати давлат котиби билан суҳбати ҳақида бормоқда, унда Америка етакчиси овозларнинг унинг фойдасига қайта санаб чиқишни сўраган.