Samarqanddagi maktabda qozonxona “kotyoli” portlashi oqibatida bir kishi vafot etdi

Samarqand shahridagi maktablardan birining qozonxonasida portlash sodir bo‘ldi, deya xabar berdi “Daryo” muxbiri.

Aytilishicha, voqea 2021-yilning 2-yanvaridan 3-yanvarga o‘tar kechasi 4-umumta’lim maktabida sodir bo‘lgan.

Aniqlanishicha, 2-yanvar, shanba kuni, taxminan, soat 23:00 da maktab va ushbu hududdagi mahallarda 40 daqiqa elektr uzilishi kuzatilgan. Natijada gaz bosimi ko‘tarilgan. Maktabning qozonxona nazoratchisi 50 yoshli H. qozonxonaga kirganida, portlash sodir bo‘lgan.

Portlash natijasida boshidan og‘ir tan jarohati olgan qozonxona ishchisi Respublika shoshilinch tez tibbiy yordam ilmiy markazi Samarqand viloyat bo‘limiga yotqizilgan. 3-yanvar kuni ko‘rsatilgan tibbiy yordamga qaramasdan qozonxona ishchisi vafot etgan.

Portlash natijasida hech qanday yong‘in kelib chiqmagan.