Lionel Messi: “Xosep Bartomeu meni uzoq yillar davomida juda ko‘p aldadi”

“Barselona” hujumchisi Lionel Messi La Sexta nashriga bergan intervyusida katalonlar sobiq prezidenti Xosep Bartomeu haqida fikr bildirdi.

Bartomeu uni nimalarda aldagani haqida

“Juda ko‘p narsada (kuladi). To‘g‘risi, juda ko‘p vaziyatda yolg‘on ishlatildi. Klubda ro‘y bergan alohida holatlar haqida gapirishni yoqtirmaganim bois ularni ommaga oshkor qilolmayman. Nimalar deyilgani va va’da qilinganini aytmayman, biroq sizni ishontirib aytamanki, Bartomeu bir necha yil davomida juda ko‘p marta yolg‘on gapirdi”.

“Barselona” rahbariyati ijtimoiy tarmoqlarda futbolchi haqida negativ kayfiyat yaratishga uringani haqida

“Rostini aytsam, men bunga katta ahamiyat bermadim. Klubda meni o‘ylantirib qo‘yadigan yoki surishtiruv o‘tkazishga majbur qiladigan bundanda muhim ishlar sodir bo‘lgan. Shu sabab bu masalaga u qadar katta ahamiyat bermaganman”.

Messi avgust oyida “Barselona”ni tark etishni istayotganini ma’lum qilgan, biroq Bartomeu qo‘l ostidagi rahbariyat bunga yo‘l qo‘ymagandi. Oktabr oyida Bartomeuga nisbatan ishonchsizlik votumi e’lon qilindi, oxir-oqibat funksioner muddatidan avval prezidentlik lavozimini tark etishga majbur bo‘ldi. Yanvar oyida “Barselona” prezidentligi uchun saylov o‘tkaziladi.