O‘zbekiston Prezidenti Shavkat Mirziyoyev Toshkentda bo‘lib o‘tayotgan O‘zbekiston yoshlari forumida ishtirok etdi. Uchrashuvda Prezident “Yoshlar: 1+1” dasturi doirasida ishsiz va uyushmagan yoshlarni kasb-hunar va tadbirkorlikka o‘qitish tashkil etilishini ma’lum qildi.
Ta’kidlanishicha, “Har bir tadbirkor — yoshlarga madadkor” tamoyili asosida 1 nafar tadbirkorga 1 nafardan ishsiz yoshni biriktirish tashabbusi ko‘plab tadbirkorlar tomonidan faol qo‘llab-quvvatlandi. 2021-yilda kamida 500 ming nafar yoshni ish bilan ta’minlashi mumkin bo‘lgan bu harakatni davlat rahbari ma’qulladi.
“Hunarli kishi xor bo‘lmas, deydi xalqimiz. Ammo keyingi paytda farzandlarimizning mohir hunarmandlar qo‘lida kasb-hunar o‘rganishiga yetarli e’tibor berilmayapti. Vaholanki, ustoz ko‘rgan o‘g‘il-qizlarimiz domlasiga munosib bo‘lishga intiladi, ularning ko‘magi bilan hayotda o‘z o‘rnini topadi. Shu bois hududlarda ustoz-shogird an’anasini kuchaytirsak, o‘ylaymanki, nur ustiga nur bo‘ladi. Bu ishga jalb etiladigan hunarmand ustalarni Bandlikka ko‘maklashish jamg‘armasidan moddiy rag‘batlantirish tizimi joriy etiladi”, – deya ta’kidladi Shavkat Mirziyoyev.
Davlat rahbari erkin iqtisodiy zonalar bo‘yicha mavjud tajriba asosida hududlarda Yoshlar kichik sanoat zonalari tashkil etilishini e’lon qildi. Bu sanoat zonalarida o‘sib kelayotgan avlod vakillarining biznes loyihalari joylashtiriladi.
“Yoshlarning loyihalarini moliyalashtirish uchun Investitsiyalar va tashqi savdo vazirligi qoshida alohida jamg‘arma tashkil etiladi va unga 100 million dollar mablag‘ ajratiladi. Jamg‘arma yoshlarning loyihalarini ro‘yobga chiqarish uchun qulay shartlarda va past foizlarda moliyalashtiradi. Bundan tashqari, kichik sanoat zonalarida ishlab chiqarish binolari qurilib, yoshlarga imtiyozli shartlarda ijara va lizing asosida beriladi”, – deydi Prezident
Forumda mutasaddilarga bu borada ko‘rsatmalar berilgan.
Mavzuga doir:
Izoh (0)