Yosh tiktokerlarning hozirgi ishlari kimgadir yengil-yelpi ko‘ringani bilan, vaqt o‘tib ular ulg‘aygach, nisbatan jiddiyroq va yaxshiroq videolar oladi. Bu haqda Toshkent shahar hokimi Jahongir Ortiqxo‘jayev 23-dekabr kuni bo‘lib o‘tgan Tashkent City TikTok Awards 2020 taqdimotidagi chiqishida aytib o‘tdi.
Avvalroq hokim bu tadbirni “nafaqat O‘zbekistonda, balki dunyodagi birinchi tiktokerlar bayrami” deb atagani haqida xabar berilgan edi. Tadbirda Ortiqxo‘jayev “Yil tavsiyasi” yo‘nalishida eng yaxshi deb topilgan Littos dueti vakiliga mukofot va sovg‘alar topshirgan.
“Biz har doim siz bilan birgamiz. Hozir siz olayotgan videolar kim uchundir yengil-yelpi ko‘rinar, lekin bu sizning yoshingiz kategoriyasi. Yoshingiz ulg‘aygach, nisbatan jiddiyroq, yaxshiroq videolar ham olasiz. Hozir sizlarni qo‘llab-quvvatlasak, o‘ylaymanki, kliplaringiz, materiallaringiz dunyoga chiqadi. Zotan, dunyoga chiqib bo‘ldingiz ham”, — deb aytgan hokim Jahongir Ortiqxo‘jayev o‘z chiqishida.Hokimning: “Bugungi bayram yoqyaptimi?”, degan savoliga yig‘ilganlar qarsaklar va xursandchilik hayqiriqlari bilan javob qaytargan.
Bu Jahongir Ortiqxo‘jayevning tiktokerlar haqida birinchi marta iliq fikr bildirishi emas. Avvalroq, Toshkent yoshlar forumi ochilishiga bag‘ishlangan matbuot anjumanida bugun ahamiyatsiz bo‘lib ko‘rinayotgan tiktokerlar ertaga ahamiyatli shaxsga aylanib qolishi hech gap emasligini ta’kidlagan edi.
“TikTok’ni internet olamining bir qismi deb bilaman... Yurtimizda tiktokerlarga taqiq qo‘yish emas, ularni to‘g‘ri yo‘lga yo‘naltirish bo‘yicha ish olib borishimiz kerak. Yoshlarga to‘g‘ri yo‘l ko‘rsatib, ularga to‘g‘ri yo‘nalish ko‘rsatib, qilayotgan ishlaridan samarali foydalansa bo‘ladi, deb o‘ylayman”, — degandi o‘shanda hokim.
Izoh (0)