“Navoiyazot”ning yangi kimyoviy majmuasida ilk karbamid mahsuloti olindi

2016-yil sentabr oyida “Navoiyazot” AJda qurilishi boshlangan “Ammiak va karbamid ishlab chiqarish” majmuasida barcha ishlar yakunlanib, 23-dekabr kuni ilk karbamid mahsuloti olindi. Bu haqda “O‘zkimyosanoat” matbuot xizmati xabar berdi.

Majmua Yaponiyaning Mitsubishi Heavy Industries Ltd va Mitsubishi Corporation kompaniyalari konsorsiumi bilan hamkorlikda qurilgan. Ishlab chiqarish texnologiyalari dunyoning eng yetakchi kompaniyalari, xususan, ammiak ishlab chiqarish bo‘yicha Daniyaning Haldor Topsoe, karbamid ishlab chiqarish bo‘yicha Italiyaning Saipem kompaniyasi hamda karbamid granulyatsiyasi bo‘yicha Germaniyaning Uhde kompaniyalari yetkazib bergan. Asosiy texnologik uskunalar Yaponiya va Yevropadan keltiriladi.

Majmuada yiliga 660 ming tonna ammiak va 577,5 ming tonna karbamid ishlab chiqariladi. Ammiakning 330 ming tonnasi yangi karbamid ishlab chiqarishga va 330 ming tonnasi mavjud ammiakli selitra ishlab chiqarishga yo‘naltiriladi. Loyiha to‘liq quvvatga chiqqanda 1 trillion 428 milliard so‘mlik tovar mahsulot ishlab chiqariladi va kimyo tarmog‘ini 9,5 foizga o‘sishga olib keladi. Yiliga budjetga 600 milliard so‘m miqdoridagi tushumlarini ta’minlaydi hamda 58 million dollarlik qo‘shimcha mahsulot eksport qilinadi.

Loyihani amalga oshirish natijasida 1964-yilda qurilgan, ma’naviy jihatdan eskirgan, energiyasi sarfi yuqori bo‘lgan “Navoiyazot” AJ 1- va 2-ammiak ishlab chiqarish sexlari foydalanishdan chiqariladi.

“O‘zkimyosanoat”ning ta’kidlashicha, mamlakat qishloq xo‘jaligining karbamidga bo‘lgan ehtiyoji to‘liq qoplanadi. Xususan, g‘alla va paxta hosilini agrotexnik muddatlarida gektarga qo‘shimcha 100-150 kilogrammgacha o‘z vaqtida karbamid mineral o‘g‘iti bilan oziqlantirish imkonini beradi. Bundan tashqari, Markaziy Osiyo davlatlari, Afg‘oniston, Turkiya, Ukraina va Gruziyaga mahsulot eksport qilinishi rejalashtirilgan.