Qashqadaryo viloyati Chiroqchi tumanida bir sutkada 16 soatgacha elektr energiyasi ta’minoti o‘chirilayotgani haqida xabar berilgandi. 25-dekabr kuni Qashqadaryo hududiy elektr tarmoqlari matbuot xizmati ushbu holat yuzasidan munosabat bildirdi.
Ta’kidlanishicha, yagona energetika tizimida quvvat tanqisligi holatlari yuzaga kelganligi sababli yagona energetika tizimida turg‘un ish rejimini saqlash, sodir bo‘lishi mumkin bo‘lgan avariyalarning oldini olish maqsadida Milliy elektr tarmoqlariga qarashli dispetcherlik xizmatlari tomonidan yuqori kuchlanishli havo elektr uzatish tarmoqlarida elektr energiyasini cheklash holatlari kuzatilmoqda.
Buning oqibatida viloyatidagi ayrim iste’molchilarni elektr energiyasi bilan ta’minlash imkoni bo‘lmayapti.
“Yakkabog‘-1, Yakkabog‘-2, Shahrisabz yuqori kuchlanishli havo elektr uzatish tarmoqlarini Milliy elektr tarmoqlariga qarashli dispetcherlik xizmatlari tomonidan cheklashga o‘chirilishi yoki avariyaga qarshi avtomatika tizimlarini ishga tushishi oqibatida Chiroqchi tumani elektr ta’minotida cheklovlar yuzaga kelgan.
Elektr ta’minotida cheklovlar kuzatilayotgani va uning sabablari yuzasidan Energetika vazirligi va boshqa mutasaddi tashkilotlar tomonidan OAV orqali tegishli izohlar berilgan. Shunday bo‘lsa-da, elektr ta’minoti bo‘yicha bildirilayotgan e’tiroz va noroziliklarni bartaraf etish maqsadida Qashqadaryo hududiy elektr tarmoqlari tomonidan viloyatimizga o‘rnatilayotgan elektr energiyasi yetkazib berish limitlarini oshirishga amaliy yordam so‘rab mutasaddi tashkilotlarga murojaat etib kelinmoqda”, – deyiladi Qashqadaryo hududiy elektr tarmoqlari axborot xizmati xabarida.
Avvalroq Chiroqchida aholi e’tiroziga sabab bo‘lgan yaroqsiz simyog‘ochlar yangisiga almashtirilgani, “svet” o‘chib qolgani sababli Oliy sud majlisi boshqa kunga qoldirilgani hamda Qarshi shahrining ayrim hududlari olti soatlab elektrsiz qolgani haqida xabar berilgandi.
Izoh (0)