Oliy sudning Jinoyat ishlari bo‘yicha sudlov hay’ati 21-dekabr kuni Sardoba suv omboridagi avariya bilan bog‘liq jinoyat ishini ko‘rib chiqishni boshladi. Bu haqda Oliy sud matbuot xizmati jarayon boshlanganidan to‘rt kun o‘tib, 25-dekabrda ma’lum qildi.

Xabar berishlaricha, ish bo‘yicha “O‘zbekiston temir yo‘llari” kompaniyasining “Gidrotexnik inshootlar qurish direksiyasi” boshlig‘i lavozimida ishlagan M.Holmatov va boshqalar — jami 17 kishi sudlanmoqda. Oliy sud matbuot xizmatining alohida qayd etishicha, “ushbu jinoyat ishi bevosita davlat sirlari bilan bog‘liq bo‘lganligi sababli Jinoyat-protsessual kodeksining 19-moddasi 1-qismi talablariga muvofiq yopiq tarzda ko‘rilayapti”.

Sudlanuvchilar Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 203-moddasi (suv yoki suv havzalaridan foydalanish shartlarini buzish), 205-moddasi (hokimiyat yoki mansab vakolatini suiiste’mol qilish), 207-moddasi (mansabga sovuqqonlik bilan qarash), 209-moddasida (mansab soxtakorligi) va 258-moddasi (tog‘-kon, qurilish yoki portlatish ishlari xavfsizligi qoidalarini buzish) nazarda tutilgan jinoyatlarni sodir etganlikda ayblanmoqda.

“Sud jarayoni davom etmoqda. Ishni ko‘rib chiqish natijalari bo‘yicha alohida bayonot beriladi”, — deyiladi Oliy sud axborotida.

2020-yilning 1-may kuni Sirdaryo viloyatida joylashgan Sardoba suv omborida to‘g‘on o‘pirilishi yuz berdi (to‘g‘on 2010—2017-yillarda 1,2 trillion so‘m evaziga qurilgan). Hodisa oqibatida viloyatning Sardoba, Oqoltin va Mirzaobod tumanlaridagi, shuningdek, Qozog‘istonning Maqtaaral tumanidagi aholi punktlari va ekinlarga zarar yetdi, binolar, yo‘llar, kommunikatsiyalar vayron bo‘ldi. Hodisa oqibatida, so‘nggi ma’lumotlarga ko‘ra, olti kishi halok bo‘lgan, 90 mingga yaqin aholi evakuatsiya qilingan.

Sardoba suv ombori to‘g‘oni o‘pirilishi oqibatida yuz bergan suv toshqini yuvib ketgan yo‘l, 2020-yil, may.

Foto: Shuhrat Latipov / “Gazeta.uz”

Dastlab hodisaga kuchli yomg‘ir va shamol sabab bo‘lgani haqida taxminlar ilgari surildi, biroq keyinroq voqea yuz berishi arafasida kuchli shamol va yog‘ingarchilik kuzatilmagani, hodisaga loyiha hujjatlaridagi, qurilishdagi va ekspluatatsiyadagi xato va kamchiliklar sabab bo‘lgani ma’lum qilindi. Bosh prokuraturaning iyul oyi oxiridagi bayonotida ish bo‘yicha qamoqqa olinganini e’lon qildi, keyinroq oktabr oyida ishga 17 kishi gumonlanuvchi sifatida jalb etilgani ma’lum bo‘ldi.

Shavkat Mirziyoyev Sardoba suv ombori to‘g‘onining buzilgan joyida, 2020-yil 2-may.

Foto: Prezident matbuot xizmati

Prezident fojiadan besh kun o‘tib qilgan chiqishida hodisa tergovi bo‘yicha “hech qanday ortiqcha gap-so‘zlarga va mish-mishlarga o‘rin bo‘lmasligi lozim”ligini ta’kidlagan edi. “Mening topshirig‘imga ko‘ra, huquqni muhofaza qiluvchi organlar tomonidan suv toshqini bilan bog‘liq voqea yuzasidan obyektiv, xolis va keng qamrovli tergov harakatlari boshlangan. Xalqimizni ishontirib aytaman — tergov yakunlari bo‘yicha barcha aybdorlar, kim bo‘lishi va egallab turgan lavozimidan qat’i nazar, qonun oldida javob beradi”, — degandi o‘shanda davlat rahbari.