Oliy va o‘rta maxsus ta’lim vazirining birinchi o‘rinbosari O‘ktam Salomov Xalqaro press-klubning navbatdagi sessiyasida O‘zbekistondagi oliy ta’lim muassasalarining talabalari o‘rtasida koronavirus infeksiyasini yuqtirib olish holatlari deyarli kuzatilmayotganini ma’lum qildi.
Vazir o‘rinbosarining so‘zlariga ko‘ra, koronavirus bilan kurashish va pandemiya davrida ta’limni tiklash jarayoni Oliy ta’lim vazirligi uchun birmuncha osonroq kechgan.
“Chunki bizgacha Xalq ta’limi vazirligi bu bosqichdan o‘tgandi. Oliy ta’lim vazirligi ushbu jarayonda qatnashib, bu borada ma’lum bir tajribaga ega bo‘ldi. Lekin oliy ta’lim tizimining o‘ziga xos xususiyatlari bor edi. Masalan, talabalarning yoshi katta bo‘lib, ular koronavirus yuqishi ehtimoli yuqori bo‘lgan toifaga kirishardi. Bundan tashqari, aksariyat oliy ta’lim muassasalari talabalari turli hududlardan kelib o‘qishlariga to‘g‘ri kelardi, mazkur vaziyatda ular talabalar turar joylarida yoki ijarada yashashi bilan bog‘liq muammolar bo‘lgani uchun an’anaviy ta’limni XTVga nisbatan kechroq boshladik”, — deydi O‘ktam Salomov.
Salomovga ko‘ra, Oliy va o‘rta maxsus ta’lim vazirligi ham talabalar va ularning ota-onalari o‘rtasida so‘rov o‘tkazgan. Ta’kidlanishicha, respondentlarning 82 foizi an’anaviy ta’limni yoqlab ovoz bergan, Shundan so‘ng, Respublika maxsus komissiyasining 12-noyabrdagi qaroriga asosan 16-noyabrdan barcha oliy ta’lim muassasalarida an’anaviy shaklda ta’limga o‘tilishi tavsiya etilgan.
“An’anaviy ta’lim qayta tiklangach, talabalar va OTM xodimlari, professor-o‘qituvchilari o‘rtasida koronavirus infeksiyasi tarqalishining oldini olish maqsadida vazirligimiz hamda SSV o‘rtasida qo‘shma qaror qabul qilindi. Mazkur qaror bilan koronavirus keng yoyilishiga qarshi profilaktik chora-tadbirlar tasdiqlanib, shuning doirasida OTM xodimlariga COVID-box’lar tarqatildi. Professor-o‘qituvchilari va boshqa xodimlarining koronavirus bilan kasallanish ko‘rsatkichlari O‘zbekistondagi o‘rtacha statistikadan oshmaydi. Xuddi maktab o‘qituvchilarida bo‘lgani kabi OTM professor-o‘qituvchilarining 0,2 foizi COVID-19 bilan kasallangan”, — deydi vazir o‘rinbosari.
Avvalroq Xalq ta’limi vazirining birinchi o‘rinbosari Usmon Sharifxo‘jayev O‘zbekistonda noyabr—dekabr oylarida umumta’lim maktablarida faoliyat olib borayotgan o‘qituvchilarning 0,2 foizida kasallanish holatlari kuzatilganini ma’lum qilgandi.
Mavzuga doir: Oliy ta’lim vazirligi: Agar talabalarda imkoniyat bo‘lmasa, o‘qishni masofadan turib davom ettirishi mumkin
Izoh (0)