O‘zbekiston Prezidenti tomonidan berilgan topshiriqlar ijrosi doirasida rastalarni mahsulotlar bilan to‘ldirish, dehqon bozorlari va yirik savdo obyektlarida yarmarkalar tashkil etish, ularga mahsulotlarni arzonlashtirilgan narxlarda yetkazib berish borasida ishlar ahvoli bosh prokuror tomonidan joylarga chiqqan holda o‘rganilmoqda. Bu haqda Bosh prokuratura axborot xizmati xabar berdi.
Ma’lum qilinishicha, bosh prokuror Nig‘matilla Yo‘ldoshev va Bosh prokuratura huzuridagi Iqtisodiy jinoyatlarga qarshi kurash departamenti boshlig‘i Dilshod Rahimov 24-dekabr kuni Toshkent shahrining “Mirobod”, “Askiya”, “Chilonzor”, “Farhod” va “Eski jo‘va” dehqon bozorlarida bo‘lib, mavjud ahvol bilan yaqindan tanishdi.
Qayd etilgan bozorlarda boshqa barcha hududlardagi kabi Yangi yil bayrami munosabati bilan arzonlashtirilgan bayram yarmarkalari tashkil etilgan. Jumladan, o‘rganilgan 5 ta bozordagi narx-navoning barqarorligini ta’minlash uchun jami 15 nafar prokuratura va departament organlarining xodimlari biriktirilgan.
Yarmarkalarga Surxondaryo, Xorazm, Andijon, Farg‘ona, Qashqadaryo viloyatlarining 50 ta fermer va dehqonlari hamda qariyb 100 nafar ulgurji savdo hamda ishlab chiqarish korxonalari nomma-nom biriktirilib, ularga 350 ta rasta ajratilgan.
“Ushbu dehqon bozorlarida hafta boshidan buyon 30 turdagi 2586 tonna oziq-ovqat mahsulotlari arzonlashtirilgan narxlarda sotilgan bo‘lib, 267 tonna go‘sht, 7,6 million donadan ortiq tuxum, 722 tonna kartoshka, 160 tonna shakar, 136 tonna guruch aholiga hamyonbop narxda yetkazib berilishi ta’minlangan.
Bundan tashqari, baliq, konserva, salqin va spirtli ichimliklar, sut mahsulotlari, mevalar, shu jumladan, sitruslar hamda turli shirinliklar savdosi ham yo‘lga qo‘yilgan”, — deyiladi Bosh prokuratura xabarida.
Qayd etilishicha, ichki iste’mol bozorida asosiy turdagi oziq-ovqat mahsulotlari narxining barqarorligini ta’minlash hamda belgilangan vazifalarni tizimli ravishda davom ettirish to‘g‘risida bosh prokuror tomonidan mas’ullarga aniq ko‘rsatma va topshiriqlar berildi.
Izoh (0)