Sirdaryo viloyati Guliston shahrida 2020-yilning 20-dekabr va 23-dekabr kunlari gumburlash va yer silkinishiga o‘xshash hodisalar ro‘y bergani haqida xabar berilgandi. Unda vaziyatni batafsil o‘rganish maqsadida Favqulodda vaziyatlar vazirligiga tezkor axborotnomalar yuborilgani, bu bo‘yicha maxsus ishchi guruh tashkil qilinib, Gulistondagi yer silkinishi holatlarini o‘rganishni boshlagani aytilgandi.
O‘rganish xulosalari yuzasidan FVV Seysmoprognostik monitoring Respublika markazi boshlig‘i Qahramon Qo‘chqorov tomonidan onlayn brifing davomida ushbu hodisalarga tegishli tafsilotlar ma’lum qilindi.
Qayd etilishicha, O‘zbekiston, Qirg‘iziston va Tojikiston seysmik stansiyalardan olingan ma’lumotlar tahlili natijasida 2020-yilning 20-dekabr kuni Toshkent vaqti bilan soat 16:33 da Guliston shahridan 8 kilometr janubi-g‘arbda magnitudasi — 3, chuqurligi yer yuziga yaqin bo‘lgan 5—10 kilometr atrofida zilzila sodir bo‘lgan.
Zilzila o‘chog‘i yer yuzasiga yaqin bo‘lgani sababli gumburlash ovozi eshitilgan.
Ta’kidlanishicha, bu hodisaning qisqa hududda, Guliston shahri va uning atrofida sezilishining sababi — zilzila yer yuziga yaqin joyda sodir bo‘lgani bilan bog‘liq. Bu holatda uning tarqalish maydoni qisqa bo‘ladi.
“23-dekabr kuni ham xuddi shunday magnitudasi 2,7 balli zilzila bo‘lgan. Zilzilaning yer yuziga yaqin bo‘lgani uchun bu safar ham gumburlash ovozi bilan kuzatilgan”, — deydi Qahramon Qo‘chqorov.
Mutaxassisning ta’kidlashicha, zilzila yer ostida qancha chuqurlikda sodir bo‘lsa, uning ta’sir doirasi shuncha keng bo‘ladi.
Eslatib o‘tamiz, bu kabi gumburlash ovozlari bunga qadar Namangan viloyatida ham bir necha bor kuzatilgan edi. Xususan, 2018-yil 6-dekabr kuni Namanganda ilk bor qattiq gumburlash ovozi eshitilgandi. O‘shanda avvaliga Mingbuloq neft konida portlash yuz bergani ma’lum qilindi, keyinchalik bu xabar rad etildi. 14-dekabrda esa bu holat yana takrorlangandi. 2019-yilning 29-martida Namanganda uchinchi marta gumburlash sodir bo‘lgan. Favqulodda vaziyatlar vazirligi ushbu gumburlashlar tabiat hodisasi bilan bog‘liq emasligini ma’lum qilgan.