Netflix striming xizmati rasman “Emili Parijda” serialining 5-mavsumi qachon chiqishini e’lon qildi. Serial muallifi Derren Star so‘zlariga ko‘ra, keyingi seriyalar “ikki shahar haqidagi hikoyalar”dan iborat bo‘ladi va bosh qahramon Parij va Rim o‘rtasida sarson qoladi. Shuningdek, Emili Venetsiyaga ham tashrif buyuradi.
Aktriss Lili Kollinz yana Emili Kuper roliga qaytadi. U bilan birga tomoshabinlar avvaldan tanish bo‘lgan qahramonlarni: Filippin Lerua-Bolye (Silvi), Eshli Park (Mindi), Lukas Bravo (Gabriel), Samuel Arnold (Julien), Bruno Goeri (Lyuk), Uilyam Abadi (Antuan), Lusyenn Laviskont (Alfi) va boshqalarni qayta ko‘radi.
Serialga yangi aktyorlar ham qo‘shiladi. Jumladan, Brayen Grinberg, Mishel Laroklar yangi mavsumda ishtirok etadi. “Oskar” mukofotiga nomzod bo‘lgan Minni Drayver esa malika Jeyn obrazini gavdalantiradi.
Yangi mavsum boshida Emili Parijdagi odatiy hayotidan chiqib, Rimdagi Grateau agentligining yangi ofisida ish boshlaydi. Bu qaror uning kasbiy o‘sishi uchun katta imkoniyat bo‘lsa-da, Parijdagi jamoasi va do‘stlaridan uzoqlashish unga oson kechmaydi.
Italiyada u kelishgan tadbirkor Marchello bilan tanishadi va u bilan munosabatlari tezda romantik tus oladi. Ammo u Gabriel bilan o‘rtasidagi his-tuyg‘ularni hamon unutmagan bo‘ladi. Shunday qilib, Emili yangi muhabbat va eski tuyg‘ular o‘rtasida chigal vaziyatga tushib qoladi.
“Emili Parijda”ning 4-mavsumi Netflix’ning global reytingida relizdan so‘ng darhol yetakchilik qilgan va bir necha hafta davomida yuqori o‘rinlarni egallagan. Beshinchi mavsum premyerasi 18-dekabr kuni bo‘lib o‘tadi.
Izoh (0)