Shimoliy Koreya yetakchisi Kim Chen In Rossiya Federatsiyasining Kursk shahrida harbiy operatsiyalarda qatnashgan shimoliy koreyalik askar va qo‘mondonlarni olqishladi. Bu haqda KCNA xabar berdi.
Ma’lum qilinishicha, Kim Chen In 20-avgust kuni xorijdagi harbiy amaliyotlar uchun mas’ul shimoliy koreyalik harbiy birliklarning yetakchi qo‘mondonlari bilan shaxsan uchrashgan. Prezident harbiylarning jangovar harakatlari haqida batafsil ma’lumot olib, ularni Rossiyaning Kursk shahrini Ukraina askarlaridan tozalashdagi muvaffaqiyatlari uchun maqtagan.
“Bizning armiyamiz qahramon qo‘shin. Nega deganda, ular qahramon xalqimiz tomonidan tarbiyalanib voyaga yetkazgan o‘g‘lonlardan tashkil topgan. Armiyamiz o‘zining yuksak fazilatlarini to‘liq namoyon etdi. Bu natija bilan bizning armiyamiz o‘zini dunyoning eng kuchlisi sifatida tanitdi. Ular hozir qilishi kerak bo‘lgan ishni qilmoqda. Kelajakda ham shunday bo‘ladi”, dedi KXDR yetakchisi.
Rossiya bilan strategik hamkorlik
Kim Chen In va Rossiya зrezidenti Vladimir Putin o‘rtasida 2024-yil iyun oyida keng qamrovli strategik hamkorlik shartnomasi imzolangan edi. Ushbu kelishuv 2024-yil 4-dekabrda kuchga kirgan bo‘lib, u jami 23 moddadan iborat. Kelishuvning 4-moddasiga ko‘ra, agar bir tomon qurolli hujum tufayli urush holatiga tushsa, ikkinchi tomon BMT Nizomining 51-moddasi va ikki davlat qonunlariga muvofiq barcha mumkin bo‘lgan harbiy yordamni ko‘rsatishi shart.
Rossiya TIVning ta’kidlashicha, ushbu shartnoma ikki tomonlama ko‘p qirrali hamkorlikni yangi strategik darajaga olib chiqadi va shimoli sharqiy Osiyo hamda Osiyo-Tinch okeani mintaqasida barqarorlikni ta’minlashga xizmat qiladi. Ma’lumot uchun, Janubiy Koreya milliy razvedka xizmatiga ko‘ra, KXDR Rossiyaga Ukraina bilan urushda foydalanish uchun 15 mingdan ortiq harbiy kuch yuborgan. Ularning taxminan 600 nafari halok bo‘lgan, kamida 4 ming nafari esa yaralangan.
Izoh (0)