“Pobeda” aviakompaniyasi “Vnukovo” aeroportidan ko‘tarilib, havoda 1,5 soat parvoz qilgan holda yana shu aeroportga qaytib keladigan noodatiy reysni yo‘lga qo‘ygan edi. Esquire’ning yozishicha, birinchi reys uchun chiptalar 8 daqiqa ichida sotib bo‘lingan.
Mazkur reys yo‘lovchilari bir yarim soat “Oltin halqa” shaharlari uzra parvoz qilgan. Chipta narxi — 7,5 ming rubl (99 dollar).
Parvoz vaqtida “bloger uchuvchi Lyoxa” nomi bilan tanilgan va “Nebonutiye” podkastining boshlovchisi, uchuvchi Aleksey Kochemasov mualliflik ekskursiyasini amalga oshirgan.
Ekskursiya vaqtida yo‘lovchilarga parvozga qanday tayyorgarlik ko‘rilishi va styuardessalar ishida qanday “sirlar” borligi haqida ma’lumotlar berilgan.
Hozircha aviakompaniya bu kabi reysdan ikkitasini amalga oshirgan: 19 va 20-dekabr kunlari. Birinchi reysga chiptalar to‘liq 8 daqiqa ichida, ikkinchisiga esa 6 daqiqada sotib bo‘lingan.
Eslatib o‘tamiz, avgust oyida tayvanliklar parvozlarni sog‘inganidan “hech qayerga” uchayotgani to‘g‘risida xabar berilgandi. Ular samolyotga o‘tirib, havoda aylangach uyga qaytishni boshlagan.
Izoh (0)