«Барселона» ҳужумчиси Лионель Месси Ла Лига доирасида «Валенсия»га қарши ўтказилган 19 декабрь кунги беллашувда (2:2) пенальтидан гол ура олмади.
Натижада аргентиналик футболчи Ла Лига тарихида амалга оширилмаган пенальтилар сони бўйича 2-ўринга кўтарилди. Месси ҳозирга қадар 13 марта пенальтидан гол ура олмаган. Бу орқали Лео «Спортинг Хихон» ва «Барселона» собиқ ҳужумчиси Кинига тенглашиб олди.
Бу кўрсаткич бўйича Ла Лига тарихида 1-ўринда «Атлетико» ва «Реал» собиқ форварди Уго Санчес бормоқда — 15 та фойдаланилмаган пенальти. 3-поғонани эса «Эспаньол», «Реал Сосьедад», «Райо Вальекано» собиқ аъзоси Рауль Тамудо банд этган — 12 та амалга оширилмаган пенальти.
«Реал» собиқ ҳужумчиси Криштиану Роналду Ла Лигада 11 та пенальтини голга айлантира олмаган.
Қайд этиш жоиз, Месси «Валенсия»га қарши баҳсдаги пенальти орқали Ла Лигадаги пенальтилар сони бўйича Роналду билан тенглашди. Энди иккала футболчининг ҳисобида ҳам 72 та пенальти зарбаси мавжуд.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)