Bentley Mulliner atelyesi “jahon ko‘lamidagi yulduzi”ning buyurtmasiga asosan Flying Spur V8 sedanining maxsus versiyasini taqdim etdi. Mijozning ismi oshkor etilmagan, biroq kapotdagi bug‘ular tasviri va “quloqsiz bolalar ro‘yxati” navigatsiyasidan gap Santa-Klaus haqida ketayotganini anglash qiyin emas, deb xabar beradi Motor.
Bentley Flying Spur V8 maxsus versiyasi Santa-Klausning chanasini tortuvchi bug‘ular sharafiga Reindeer Eight nomini olgan. Sedan Cricket Bauble “metallik” rangiga bo‘yalgan. Kuzovning ostki qismiga gradiyentli geometrik naqshlar tushirilgan.
Flying B’ning odatdagi shakli o‘rniga, mashina kapotini 3D-printerda chop etilgan tillarang bug‘u bezab turadi. Qimmatbaho metall bilan kapotdagi hoshiyalar va old qanotdagi “jabralar” ham bezatilgan, Reindeer Eight emblemasi esa old g‘ildiraklar yonida joylashgan. Yon tomonidagi ingichka chiziqlar esa qo‘lda tushirilgan.
Mashina egasi yil oxiriga qadar 41 million mil (66 million kilometrga yaqin) yo‘l bosishi kerak, shu sababli Mulliner mashina aerodinamikasi ustida ishlagan. Sedanning old va orqa tomonlariga uglerod plastikdan ishlangan diffuzorlar o‘rnatilgan. Tillarang 22 dyuymli g‘ildiraklarga barcha mavsumlarga xos shinalar “kiydirilgan”. Bayram mashinasining salonini oddiy va Cricket Babule 3D-charm rangi bezab turibdi.
Reindeer Eight o‘rindiqlari uzoq safarlar vaqtida maksimal qulaylikni taqdim etishi kerak. Ular isitgich, ventilyatsiya, yon va burchak yostiqchalarini boshqargich bilan jihozlangan. O‘rindiqlardagi xoch shaklini tikishga 18 soat vaqt, 11 100 individual chok va 115 metr ip ketgan, bu Yelizaveta minorasi (sobiq Big Ben) balandligiga ekvivalent hisoblanadi.
Mashinaning texnik jihati o‘zgartirilgani haqida hech qanday ma’lumot yo‘q, shu sababli Bentley Flying Spur V8 Reindeer Eight kapoti ostida 550 ot kuchiga ega (700 Nm) 4,0 litrli V8 biturbomotori o‘rin olgan. Uning yordamida sedan soatiga yuz kilometr tezlikka 4,1 soniyada erishadi, maksimal tezligi — 318 km/soat.
Avvalroq Bentley 90 yillik sportkarining aniq nusxasini yaratgani to‘g‘risida xabar berilgandi.
Izoh (0)